Боловсролын яамны хурлын заалыг нэг тэрбум гаруй төгрөг зарцуулж, зөөлөн суудал, ухаалаг самбар зэргээр тоноглосон атлаа тусгай хэрэгцээт цэцэрлэгийн тоног төхөөрөмжийг шийдэж, хүүхэд хүлээн авах сэтгэл гаргаагүй сайд П.Наранбаярыг огцруулах шаардлагыг ард иргэд тавьж байна.

Учир нь, нийслэлийн Сонгинохайрхан дүүрэгт өнгөрсөн оны сүүлээр  ашиглалтад орсон  341 дүгээр тусгай хэрэгцээт хүүхдийн цэцэрлэг тоног төхөөрөмжгүйгээс ирэх есдүгээр сарын 1-нээс ажиллах боломжгүй болжээ.

Нийслэлийн Засаг даргын орлогч А.Амартүвшингийн өгсөн мэдээллээр дээрх тусгай хэрэгцээт цэцэрлэгт гал тогооны хэрэгсэл, ширээ сандлыг шийдээгүйгээс хүүхэд хүлээн авах боломжгүй. Нийслэлийн хөрөнгө оруулалтаар дээрх цэцэрлэгийг барьж ашиглалтад оруулсан. Ашиглалтад оруулсан өнгөрсөн оны сүүлээс эхлээд тоног төхөөрөмжийг шийдэх шаардлагатайг нийслэлээс сануулж ирсэн. Гэвч бүтэн есөн сар болоход асуудал шийдэж өгөөгүй.  Уг цэцэрлэгийн тоног төхөөрөмжийг шийдэж өгсөн бол хамран сурах тойрог харгалзахгүйгээр тусгай хэрэгцээт 50 хүүхэд мөн энгийн 200 хүүхдийг хүлээн авах хүчин чадалтай.

Зөвхөн дээрх сургууль, цэцэрлэгээр хязгаарлахгүй нийслэлийн хэмжээнд шинээр барьж ашиглалтад оруулсан 13 сургууль тоног төхөөрөмж шийдээгүйгээс ирэх есдүгээр сарын 1-нд сурагчдаа хүлээн авах боломжгүй болсон байна.

Гэтэл асуудлыг шийдэж өгөх  хүсэлт тавьснаар эцэст нь ажил хийсэн нийслэлмийнхэн буруутан болж, дарамтлуулж байх жишээний.

Засгийн газарт ХҮН намынхныг хамтрагчаа болгож, Боловсролын сайдыг томилсон нь энэ салбарыг өөд нь татаад ажил хийгээдэх гэж тавьснаас биш олон мянган хүүхдийн сурч боловсрох эрхийг хясан боогдуулан сандал суудалтай зууралдах хүртэл амин хувийн эрх ашгаа тэргүүнд тавь гэж томилоогүй л болов уу.  Ерөнхий сайд та танхимын шүдний өвчин болсон Боловсролын сайддаа хариуцлага тооцохгүй бол захын гэр хорооллын хүүхэд багачуудын эрх ашиг хөсөр хаягдаж гүйцлээ.

Хурлын танхимаа тэрбум төгрөгөөр тохижуулж болсон юм, тусгай хэрэгцээт боловсрол шаардлагатай хүүхдүүдийн асуудлыг сайдын багц дотроо зохицуулалт хийгээд шийдчих сэтгэлгүй сайдтай байна гэдэг бол гамшиг шүү.

Ер нь Боловсролын сайдтай холбоотой чих халууцуулсан мэдээ ганц энэ биш. Элсэлтийн ерөнхий шалгалтыг зохион байгуулж чадаагүйгээс эхлээд сайд болохоосоо өмнө удирдлагаар нь ажиллаж байсан хувийн сургуульд албан тушаалаа ашиглан их хэмжээний мөнгө шилжүүлж, ашиг сонирхлын зөрчил үүсгэн хууль зөрчсөн зэрэг асуудлууд хөндөгдсөөр удаж байна.

Г.ХОРОЛ