Нийслэлийн ерөнхий боловсролын сургуулийн багш, ажилтны сул орон тооны мэдээллийг Боловсролын ерөнхий газраас мэдээллээ. 2025-2026 оны хичээлийн жилд нийслэлд үйл ажиллагаа явуулж буй төрийн өмчийн ерөнхий боловсролын сургуулиудад дутагдаж буй багш, ажилтны сул орон тоо 3324 хүрсэн талаар Боловсролын яамаас мэдэгдэж байсан. Үүнээс гадна боловсролын салбарын цомхотголд багш хамаарахгүй талаар Боловсролын яамны Төрийн нарийн бичгийн дарга Х.Батжаргал наймдугаар сарын 7-ны өдрийн мэдэгдлээрээ дурдаж байв.

Тэрбээр "Засгийн газрын бодлого чиг үүргийн дагуух төрийн албан хаагчийн цомхотгол багшаас бусад албан хаагчдад хамаарч байгаа.

4000 орчим багш, албан хаагчдыг халах гэж байна гэдэг ташаа мэдээлэл нийгэмд явж байна. Энэ 4000 гэдэг тооны 2000 гаруй нь сул орон тоо. Цомхотголд зөвхөн Боловсролын удирдлагын байгууллагууд орж байгаа.

Чиг үүргийг давхардлыг арилгах, орон тоог цөөлөх шинэчлэл явагдаж байна. Боловсролын яам гэхэд 10 газартай байсан бол зургаан газартай болж байгаа.  Түүнээс багш нарт цомхотгол хийхгүй. Харин ч эсрэгээрээ бидэнд багшийн орон тоо хэрэгтэй байгаа. Бид багш нарыг салбар руу нь татахын тулд ажиллаж байгаа" гэсэн юм.

Тухайлбал, нийслэлийн Баянгол дүүргийн 28 дугаар сургуульд багш, ажилтны 13 байр зарлагдсан аж. Үүнд, багш мэргэжлээс гадна жижүүр, үйлчлэгч, сантехникийн ажлын байрууд тусгагджээ.

А.ТАМИР