Нийслэлийн Засаг даргын орлогч А.Амартүвшин өнөөдөр (2025.08.15) нийслэлийн 341 дүгээр цэцэрлэг, 179 дүгээр бага сургууль дээр боловсролын салбарт хийж буй хөрөнгө оруулальын ажлын талаар мэдээлэл хийлээ.

Тэрбээр "Нийслэлийн зүгээс өчигдөр Боловсролын яаманд албан шаардлагыг тавьсан. Салбарын яамны зүгээс 2025 оны нэгдүгээр сарын 1-нээс наймдугаар сар хүртэл сургууль, цэцэрлэгт шаардлагатай сандал ширээ, тоног төхөөрөмж, гудас, гал тогооны хэрэгсэл, ор, самбар зэргийг санхүүжүүлэх боломж байсан. Гэтэл өнөөг хүртэл яамнаас ажлаа хийсэнгүй. Хоёр долоо хоногийн дараа сургууль, цэцэрлэгийн үйл ажиллагаа эхлэх гэж байна. Бид өнөөдөр Сонгинохайрхан дүүрэгт байрлах шинээр баригдсан 341 дүгээр тусгай хэрэгцээт хүүхдийн цэцэрлэг дээр ирсэн байна. Энэ цэцэрлэг 2024 оны арванхоёрдугаар сарын 12-нд ашиглалтад орсон. Хүүхдүүдээ хүлээж авахад бэлэн болоод нэг жил болж байна. Гэтэл энэ цэцэрлэг нь ширээ сандал, гал тогооны тоног төхөөрөмж, гудас оргүй байна. Хүүхдүүд, эцэг эхчүүд нь гаднаас нь л цэцэрлэгээ хараад сууж байна. Тойрог хамаарахгүй 50 гаруй тусгай хэрэгцээт хүүхэд хамрагдахыг хүлээхээс гадна энгийн 200 гаруй хүүхэд хамрагдах боломжтой. Цэцэрлэг нь бүх тусгай хэрэгцээт хүүхдүүдээ хүлээн авахад бэлэн болсон. Гадаад, дотоод тохижилтын ажил бүрэн дууссан. Гэтэл анги танхим нь хов хоосон байна. Ийм нөхцөл байдалтай 13 сургууль байна. Нийт 10500 хүүхэд тоног төхөөрөмжгүй, сандал ширээгүй гэдэг шалтгаанаар сургууль, цэцэрлэгт сурч чадахгүй байна. Бид нийслэл дээр дахин гурван ээлжээр хичээллүүлж, 50 болон 60-аар нь чихэж оруулах нь ээ. Цэцэрлэгийн хувьд ийм нөхцөл байдалтай 20 байгаа бөгөөд 3700 хүүхэд хамрагдаж чадахгүй байна.

Бид он гарснаас хойш удаа дараа салбарын яаманд хандсан. Сүүлдээ эцэг эхчүүд нийслэл дээр хариуцлага ярьж, хандаж байна. Цаана нь салбарын яам нь байгаад байдаг. Боловсролын яамнаас бүх сургууль, цэцэрлэгийн захирлуудыг томилж байгаа. Хүнд суртлын шат буюу нийслэлийн Боловсролын газар, Боловсролын ерөнхий газар гэж байгаа. Энэ бүхнийг яамнаас томилж байгаа. Бусад бүх ажлыг нийслэл хийж байгаа. Нийслэлийн хэмжээнд шинээр баригдаж байгаа 139 сургууль, цэцэрлэгийн хяналтыг тавьж, нэмэлт төсөв, хэлэлцээрийг хийж, цагаас нь өмнө ашиглалтад оруулахыг нь оруулж байгаа. Бүх цэцэрлэг, сургуулийн их засварыг нийслэлээс хийлгэж байгаа. Энэ жил 60 тэрбум төгрөг төсөвлөсөн. Үүнээс 30 тэрбумаар 177 сургуульд их засвар хийлээ. Өмнөх жилүүдэд бүр сургууль, цэцэрлэгийн засварт нийтдээ дөрвөн тэрбум төгрөг төсөвлөдөг байсан. Өвөлжилтийн бэлтгэл ажил гээд шугам сүлжээний засвар ажлыг хийж, өчигдөр гэхэд нийслэлийн Засаг дарга 6,8 тэрбум төгрөгийг нөөц хөрөнгөөс гаргаж, сургууль цэцэрлэгийн өвөлжилтийн бэлтгэл ажлыг хангуулах гэж байна. Салбар яаманд хүсэлт тавихаар бидэнд төсөв байхгүй гэдэг хариулт өгдөг. Энэ асуудалд яамнаас анхаарч, санаа тавьж байгаа асуудал ч алга. Боловсролын яамнаас жил бүр төсөв батлуулж байгаа.

Боловсролын яамны нэг тэрбум төгрөгийн сандал, ширээний тендер нь гацахгүй байж, сургууль цэцэрлэгийнх нь сандал ширээний тендер нь гацдаг. Эхнээсээ шаардлага тавьж, мэдээлэл хийсэн хүмүүсийг дарамталж эхэлж байна.

Асуудлыг хэрхэн шийдэх вэ гэж анхаарах ёстой байтал асуудлыг чимээгүй болгож, дарах гэж оролдож байна. Бид 33 сургууль дээр 62 сургууль, цэцэрлэг барьж байж хүртээмжийн асуудал 100 шийдэгдэнэ. Сургуулийн анги танхим бэлэн байгаа ч сандал ширээ нь байхгүй байна. Хүүхдээ авч эхлээгүй сургууль, цэцэрлэгийн хувьсах зардал, ажилчдын цалин хөлс байхгүйгээс ажилчид нь эхнээсээ ажлаасаа гарч байна. Бид ажлаа хийх шаардлагыг л тавьж байгаа. Огт улстөржөөгүй ээ. Нийслэлийн зүгээс сандал, ширээг нь худалдаж авч өгч болох ч хууль эрх зүйн хүрээнд аудитаас акт тавина. Нийслэлийнхэн бүх ялыг эдэлж, салбарын яам  нь ямбыг нь эзэлж байна" гэсэн юм.