Кремлийн тэргүүн Владимир Путин, АНУ-ын ерөнхийлөгч Дональд Трамп нар өнөөдөр Аляскад уулзана. Энэхүү уулзалтад оролцохоор Кремлийн талаас Оросын бие даасан баялгийн сангийн тэргүүн Кирилл Дмитриев, Гадаад хэргийн сайд Сергей Лавров, Батлан хамгаалахын сайд Андрей Белоусов, Сангийн сайд Антон Силуанов, Путины гадаад бодлогын зөвлөх Юрий Ушаков нар ерөнхийлөгчийг дагалдан явж байна. Маш чухал сэдвийн талаар ярилцах учир төлөөлөгчдийн бүрэлдэхүүн харьцангуй хязгаарлагдмал байгаа гэдгийг Юрий Ушаков хэлжээ.

Оросын төлөөлөгчдийн тоонд энхийн гэрээний ахлах хэлэлцээч Владимир Мединский багтаагүй нь анхаарал татаж байна.

АНУ-ын талаас мөн таван төлөөлөгч Трампыг дагалдах аж. Чухам хэн хэн энэ багт багтсаныг Цагаан ордон хараахан мэдээлээгүй байна.

Эргэн сануулахад, Трамп, Путин нар өнөөдөр Аляска мужийн Эльмендорф-Ричардсон цэргийн баазад уулзана. Нэгэн цагт хаант Оросын бүрэлдэхүүнд байсан тус мужид Путин анх удаа айлчилж буй нь энэ. Цаашилбал, энэ нь Орос, Украины дайн эхэлснээс хойших Путины баруун дахь анхны айлчлал болж байна. Олон улсын эрүүгийн шүүх 2023 оны гуравдугаар сард Путиныг баривчлах тушаал гаргасан ч гэлээ АНУ Гаагт төвтэй шүүхэд нэгдээгүй учир түүнийг баривчлах үндэслэл үгүй юм.

Нислэгийн мэдээллийн "Flight Radar 24" цахим хуудаснаас харвал Оросын засгийн газрын Ил-97 онгоц Пүрэв гаригт орон нутгийн цагаар 07:50 цагт Москвагийн Внуково нисэх буудлаас хөөрчээ. Харин Аляска дахь агаарын баазад орон нутгийн цагаар Пүрэв гаригийн 06:43 цагт газардах товтой байжээ. Путин, Трамп нарын ганцаарчилсан уулзалт Баасан гаригийн 11:30 цагт товлогджээ. Үүний дараа талууд бусад төлөөлөгчийн хамтаар өглөөний цайтай уулзалт зохион байгуулсны эцэст хамтарсан хэвлэлийн бага хурал хийнэ.