"BLAST Bounty"-ийн хоёрдугаар улирлын сүүлийн шатны тоглолтууд Мальтад эхэлсэн. Өрсөлдөгчөө амлан авч өрсөлддөг энэхүү тэмцээнд чансаа доогуур багууд эхэлж сонголт хийдэг. Тэр ч утгаараа шилдэг найман баг тунан үлдсэнээс турк тоглогчидтой "Aurora" баг "The MongolZ"-ийг амлан авав.

Хоёр багийн тоглолт орон нутгийн цагаар өчигдөр/2025.08.14/ болж, монгол баг 2-0 гэсэн харьцаатай хожсоноор хагас шигшээ шатанд шалгарлаа. Хоёр баг өмнө нь жилийн хугацаанд гурван удаа учраа таарахад "The MongolZ" 2-1 гэж илүүрхэж байсан бол энэ удаад харьцаагаа холдуулж, 3-1 болгов.

Эхний мап "Aurora"-ийн сонгосон "Dust2" байсан бөгөөд тус тоглолтод "The MongolZ" 13-11 гэсэн харьцаатай хожсон бол удаах "Mirage" мапын эхний хагаст турк залуус 11-0 гэсэн харьцаатай итгэл төгс илүүрхэж байсан. Тус мапын эхний хагасын төгсгөлд "bLitz" гурвын эсрэг ганцаараа үлдсэн ч ялж, харьцааг 11-1 болгожээ.

Ерөнхийдөө хоёр дахь мап дээр "Aurora" хожлоо гэж олон хүн бодсон биз. Арга ч үгүй. Тэд 11-1 гэсэн харьцаатай эхний хагасыг тэргүүлж, ердөө хоёрхон раунд л ялахад цувралын харьцааг тэнцүүлэх байв. Гэвч хоёрдугаар хагаст "The MongolZ" СТ талаасаа бараг л алдаа гаргасангүй. Үндсэн цагт 12-12 гэж тэнцүүлэн нэмэлт цагт 16-13-аар өрсөлдөгчөө буулган авчээ.

Итгэл төгс тэргүүллээ алдаж, хожигдсон "Aurora" багийнхан тоглолтын дараа сэтгэлээр унасан, цочролоосоо гарч чадахгүй байгаа харагдсан. Багийн ахлагч "MAJ3R" тоглолтын дараа "Сүүлийн гурван тэмцээнд Mirage-ийн Т талаас ганцхан раунд хожлоо. Энэ бол зүгээр зүйл биш. Хариуцлагыг би үүрнэ. Тэд СТ талаасаа сайн тоглолоо. Гэхдээ бид СТ талдаа илүү байсан ч ийм зүйл боллоо. Хэлэх үг алга. Гарц, гаргалгаа олж чадаагүйдээ би үнэхээр гунигтай байна" гэжээ.

MAJ3R багийнхаа влогийн үеэр "The MongolZ" багийг В түвшний баг гэсэн ангилалд оруулж, ам алдсан удаатай.

Тэдний хамгийн тааруу мап нь "Mirage" тэр дундаа Т тал нь болсон гэхэд хилсдэхгүй. Тус мап дээр тоглосон сүүлийн дөрвөн тоглолтдоо хожигджээ.