Японы засгийн газар гадаадын улс орнууд худал онлайн мэдээлэл болон бусад аргаар сонгуульд хөндлөнгөөс оролцохоос сэргийлэх арга хэмжээг чангатгах талаар хэлэлцэж байна. Тус улсын засгийн газрын мэдээлснээр, долдугаар сард болсон Дээд танхимын сонгуулийн үеэр зарим улс төрийн нам, нэр дэвшигчийн талаарх худал мэдээлэл нь гадаадын явуулга байж болзошгүй автомат ботуудаар тараагдсан байх магадлалтай байсан гэжээ.
Японы Үндэсний аюулгүй байдлын нарийн бичгийн дарга нарын газар болон засгийн газрын Тагнуул, Судалгааны алба ийм заналхийлэлд хамтран хариу арга хэмжээ авдаг байв. Гэвч зарим шүүмжлэгчдийн үзэж байгаагаар Японы тогтолцоо нь барууны орнуудынхоос сул бөгөөд хиймэл оюун ухаант технологийн хөгжил нь сонгуульд хөндлөнгөөс оролцох эрсдэлийг улам нэмэгдүүлж байна. Одоо Засгийн газар ийм эрсдэлтэй тэмцэх, хууль эрх зүйн зохицуулалт хийх гол үүрэг бүхий шинэ нэгжийг ерөнхий сайдын Тамгын газарт байгуулах талаар хэлэлцэж байна. Мөн Японд ямар арга хэмжээ хэрэгжүүлэх шаардлагатайг тогтоохын тулд бусад улс орны хэрэглэж буй дэвшилтэт арга хэмжээг судалж байна.

Цахим шилжилтийн сайд Таира Масааки “NHK”-д хэлэхдээ, Япон бол одоо бай болсон гэж мэдэгдсэн байна. Тэрбээр мөн сонгууль бол ардчиллын үндэс тул худал онлайн мэдээллээр дамжуулан гадаадын хөндлөнгийн оролцоог таслан зогсоохын тулд улсынхаа хамгаалалтыг бэхжүүлэх нь чухал гэв.