Дмитрий Медведев АНУ-ын ерөнхийлөгч асан Барак Обаматай хамт “Дэлхийн олон асуудлын шийдэл нь АНУ болон Оросын хамтын хүсэл зориг дээр тулгуурлана” гэж мэдэгдэж байсан үеэсээ хойш урт замыг туулжээ. Өнгөрсөн долоо хоногт тэрбээр Дональд Трампын засаг захиргаа нь хоёр орныг дайны ирмэг рүү түлхэж байна гэж хоёр ч удаа мэдэгдэж, Трамп цаашид Оросын эсрэг турхирсаар байх бол Москва цөмийн чадавхаа ашиглахаас буцахгүй гэж анхааруулсан байдаг. Хэдийгээр Оросын ерөнхийлөгч асан, Аюулгүй байдлын зөвлөлийн дэд дарга боловч түүнд өөр нэгэн хоч бий. Тэр нь Кремлийн "довтлогч нохой" юм. Энэ удаагийн "ХҮМҮҮС" буландаа Дмитрий Медведев хэн болохыг онцолж байна.

Оросын Аюулгүй байдлын зөвлөлийн дэд дарга Медведев нь гүйцэтгэх эрх мэдэлгүй ч түүний өдөөн хатгасан мэдэгдлүүд үргэлж олны анхаарлыг татдаг. Үнэн хэрэгтэй тэрбээр боловсролыг эрхэмлэгч гэр бүлд төрж, өссөн хөгжимд сонирхолтой жирийн нэгэн хүү байв. Дмитрий Анатольевич Медведев 1965 оны есдүгээр сарын 14-нд Лениныград хотноо төрсөн. Эцгийг нь Анатолий Анатольевич гэдэг бөгөөд химийн инженер, багш мэргэжилтэй. Ээж Юлия Вениаминовна мөн адил багш мэргэжилтэй ч музейн хөтчөөр ажиллаж байжээ. Тэд Купчино дүүрэгт 40м² хэмжээтэй жижиг дээврийн байранд амьдарч байв.

Медведев багадаа асар их амбицтай, ихэнхдээ “Ямар шалтгаанаар?” гэж бүх зүйлд асуулт тавьдаг байсан гэж бага ангийн багш тодорхойлсон байдаг.

Тэрбээр гуравдугаар ангидаа аавынхаа 10 боть “Бага совет энциклопеди”-г уншиж, динозавр, химийн энгийн туршилтууд сонирхож эхэлсэн байна. Дараа нь долдугаар ангидаа сургуулийнхаа нэгэн хөөрхөн охин болох Светлана Линниктай танилцсан нь Медведевийн сурлагад эергээр нөлөөлжээ. Онцлууштай нь Медведев анхны хайр Линниктайгаа гэр бүл болсон юм. 1982 онд Лениныградын Улсын Их Сургууль (одоогийн Санкт-Петербургийн их сургууль)-д эрх зүйн чиглэлээр элссэн бөгөөд хэл судлал ч сонирхож байсан. Гэвч хуулийг сонгон судалжээ. Түүнийг оюутан цагийн найзууд нь тодорхойлохдоо маш сонирхолтой хэлэлцүүлэг хийж чаддаг, дипломат байдлаар санаагаа илэрхийлдэг гэж магтан сайшаасан байдаг. Их сургуулийг 1987 онд бакалаврын зэрэгтэйгээр төгсч, 1990 онд “Улсын аж ахуй дэх иргэний эрх зүйн хэрэгжүүлэх асуудал” сэдвээр "PhD" хамгаалжээ. Дараа нь тэрбээр 1999 он хүртэл төгссөн сургуульдаа иргэний эрх зүйн болон ромын эрх зүйн хичээл зааж, гавшгай боловч хатуу биш багш гэх нэр авсан байдаг. 1988 онд тэрбээр өөрийн багш, ардчилсан удирдагч Анатолий Собчакын сонгуулийн багт оролцож, сонгуульд нь тусалжээ. Улмаар найзуудын хамт хууль, эрх зүйн байгууллага нээж, улс төрийн замналаа эрхэлсэн байна.

Улс төр, жил амьдралдаа нэр хүндтэй нэгэн байсан ч Медведев залуудаа Западын хард-рок хөгжимд дуртай байжээ. Тэрбээр Led Zeppelin, Black Sabbath, Deep Purple, Pink Floyd зэрэг хамтлагуудын дууг сонсдог. Мөн Deep Purple-ийн бүх цомгийг цуглуулсан гэдэг. Түүнчлэн залуудаа их спортлог байсан байна. Их сургуульд байхдаа завьт наадам, хүчний дасгалд оролцож, өглөө, оройдоо сэлэлт, жингийн дасгал хийдэг байжээ.

ОРОСЫН ЕРӨНХИЙЛӨГЧ

Медведев 42 настайдаа Оросын ерөнхийлөгч болж байсан. Тэрбээр одоогийн удирдагч Владимир Путин шиг КГБ-ийн ажилтан биш байв. Мөн интернэт сүлжээ ашиглан Путины эсрэг улс төрийн үзэл суртлаа танилцуулдаг байсан. Гэхдээ Путин, Медведев хоёрын хүсэл нэг зорилго нь Оросын эдийн засгийг шинэчлэх, авлигын эсрэг тэмцэх байсан. Олон нийт Медведевийн ерөнхийлөгчийн засаглал нь Үндсэн хуулийн хязгаарлалтаас зайлсхийж, эрх мэдлээ хадгалах завсрын шийдвэр гаргадаг байсан гэж үздэг. Энэ нь Путиныг улс төрд хүчтэй орж ирэхэд нөлөөлсөн гэж дүгнэдэг.

Медведев 2012 онд ерөнхийлөгчийн албан тушаалаа орхисноосоо хойш либерал технократаас хэт үндсэрхэг үзэлтэн болон хувирчээ.

Мөн нийгмийн сүлжээнд Оросын өрсөлдөгчдөд өдөөн хатгасан үгс хэлдэг болсон байна. 2009 онд "CNN"-д өгсөн ярилцлагадаа “Орос нь өрнөдтэй бүх талаараа сайн, хөгжсөн харилцаатай байх хэрэгтэй” гэж хэлж байсан хүн 2025 оны  эрс Трампын засаг захиргааг шүүмжлэх болон юм. Зарим шинжээчдийн үзэж буйгаар Медведев  “Нэгдсэн Орос” намын итгэлийг хадгалах зорилгоор өөрийгөө улс төрийн хараанд дахин байршуулж эхэлсэнтэй холбоотой.

2012 онд тэрбээр парламентын гишүүдэд “Намайг ихэвчлэн либерал хүн гэдэг. Би та нарт илэн далангүй хэлье. Би хэзээ ч либерал үзэлтэй байгаагүй” гэж хэлсэн байдаг. Ерөнхийлөгч байхдаа Медведев CNN-д “Авлигын түвшин нь хүлээн зөвшөөрөхийн аргагүй” гэж хэлж байсан. Гэвч дараа нь ерөнхий сайд байхад нь Авлигын эсрэг сангаас гаргасан мөрдөн шалгаж, сөрөг хүчний зүтгэлтэн Алексей Навальныйн баримтыг нь дэлгэсэн.

Тус баримтад Медведевийг тансаг орд харш, дарвуулт онгоц, усан үзмийн талбай зэрэгтэй “авлигын эзэнт гүрэн” байгуулсан хэмээн буруутгагджээ.

Медведевийн хэвлэлийн төлөөлөгч Наталья Тимакова уг мөрдөн шалгах ажлыг суртал ухуулга хэмээн үгүйсгэсэн ч "YouTube"-д байршуулсан Навальныйн баримт дэлгэж буй бичлэг 14 сая үзэлт авч, Медведев эсэргүүцлийн бай болсон юм. Дараа нь тэрбээр 2020 онд ерөнхий сайдын албаа гэнэт орхисон. Энэ нь Путин Үндсэн хуулийн өөрчлөлт хийж, эрх мэдлээ бататгахтай давхцав. Түүнээс хойш Аюулгүй байдлын зөвлөлд ажиллах хугацаандаа Медведев Украин болон өрнөдийн удирдагчдыг доромжилсон ксенофоб үг хэллэгтэй мэдэгдэл олноор хийж эхэлсэн. Тэрбээр "Telegram"-д 1.7 сая дагагчтай, "X" (хуучин Twitter)-ийн орос, англи хэл дээрх нийт дагагчдын тоо 7 саяд хүрдэг.

Орос Украин руу бүрэн хэмжээний довтолгоо хийсний дараа Медведев Киевийн удирдлагыг “лонхонд үржиж буй жоом” гэж нэрлэсэн. Энэ оны эхээр тэрбээр Дональд Трамп, Украины ерөнхийлөгч Владимир Зеленский нарыг утсан хүүхэлдэй болгон дүрсэлсэн зураг үзүүлж, “Киевийн нео-нацист дэглэмийг устгах”-ыг уриалсан. Тэрбээр мөн нацизмын сэдвийг байнга хөндөж, шинэ Германы канцлер Фридрих Мерцд хандан “Крымийн гүүр рүү цохилт өгөх санал гаргалаа. Хоёр удаа бод, нацист минь!” гэж мэдэгдсэн байна.

Гайхмаар хурц үгтэй ч, шинжээчдийн үзэж буйгаар Медведев Кремлийн мессеж дамжуулах дүрд тоглодог.

Дайн судлалын хүрээлэнгийн тайланд түүнийг “Өрнөдийн шийдвэр гаргагчдын дунд айдас, сандрал үүсгэх зорилготой, хурц мэдэгдлийг уламжлан түгээх Кремлийн дээд түвшний, зохион байгуулалттай мэдээллийн стратегийн нэг хэсэг" гэж үзжээ. Мөн шинжээчид түүний үг бүрт итгэж болохгүй гэж анхааруулдаг байна.

Өнгөрсөн долго хоногт болсон маргааны талаар "Quincy Institute"-ийн шинжээч Анатол Ливен “Медведевийн мэдэгдэл болон Трампын хариу хоёулаа цэвэр жүжиг” гэж тодорхойлов.

Мөн “Сүүлийн гурван жил цөмийн зэвсэг хэрэглэхээс татгалзсан Орос шинэ хориг арга хэмжээний хариуд үүнийг ашиглах нь тодорхой биш” гэсэн байна. 2009 онд Обаматай хамт хийсэн хэвлэлийн хурлын үеэр Медведев бол өөртөө итгэлтэй, шинэхэн ерөнхийлөгч, зөвхөн Путинд зориулсан “түр орлогч” биш гэдгээ харуулахыг хүсэж байв. Эл өдөр Медведев “Бид томоохон цөмийн арсеналтай бөгөөд тэдгээрийн бүрэн хариуцлагыг хүлээдэг” гэж хэлсэн байдаг Гэвч өдгөө, 16 жилийн дараа тэрбээр өдөөн хатгагчийн эрх чөлөөг эдэлж байна.