Засгийн газрын өнөөдрийн /2025.08.13/ ээлжит хуралдаанаар хэлэлцэн шийдвэрлэсэн асуудлын талаар дараах мэдээллийг хийлээ.

Сангийн сайд Б.Жавхлан:

-Өмнөговь аймгийн дулааны цахилгаан станцыг барихад шаардагдах санхүүжилтийн эх үүсвэрийг бонд гарган шийдвэрлэхээр болж, Засгийн газрын хуралдаанаас дэмжлээ. Энэ асуудал анх жилийн өмнөөс яригдсан. Өмнөговь аймгийн Иргэдийн төлөөлөгчдийн хурлаар дэмжигдээд, 2022 онд Өрийн удирдлагын тухай хуульд орсон өөрчлөлтийн дагуу орон нутгууд бие даасан бонд гаргаж болох эрх зүйн орчин бүрдсэний дагуу 500 тэрбум төгрөг хүртэлх  бонд гаргаж, дулааны цахилгаан станцаа санхүүжүүлэх санал Засгийн газарт хүргүүлсэн байдаг. Төсвийн хуулийн дагуу төсвийн жил эхлэхээс өмнө орон нутаг бонд гаргах хүсэлтээ Засгийн газраар шийдвэрлүүлсэн байх цаглабартай. Тэгэхээр хугацаандаа энэ асуудал орж дэмжигдэж байгаа гэсэн үг.

2022 онд батлагдсан шинэ эрх зүйн зохицуулалтын хүрээнд хоёр дахь удаагаа орон нутгийн бонд гаргахаар дэмжигдлээ. Эхнийх нь нийслэлийн бонд, та бүхэн мэдэж байгаа.

Өмнөговь аймгийн гаргах бонд маань өндөр ач холбогдолтой. Орон нутаг бие дааж бонд гаргаж байгаа нь анхны тохиолдол учраас Сангийн яам жилийн турш хамтарч ажиллан судалгаа хийж, бэлтгэл хангасан. Нэлээд чамбай урьдчилсан бэлэн байдлыг хангалаа. Бид хоёр том шаардлага тавьж байгаа. Нэгдүгээрт, санхүүжүлэх төсөв нь үр өгөөжтэй, орон нутгийн төсөв дээр сөрөг дарамт авчрахгүй өөрөө өөрийгөө санхүүжүүлээд явах үр өгөөжтэй төсөл байх ёстой. Нэгэнт өндөр өртөгтэй, үнэтэй мөнгө босгож байгаа учраас төсөл нь түүнийгээ давсан үр өгөөжтэй байх. Хоёрдугарат, тухайн орон нутаг нь төсвийн чадамжийн хувьд бондоо өр үүсгэхгүйгээр төлөх санхүүгийн чадамжтай байх шаардлагатай.

Өмнөговь аймгийн хувьд 50 мВт цахилгаан станц нь ашиглалтад орсноос хойш өөрөө өөрийнхөө санхүүжилтийг бүрэн нөхөөд орон нутагтаа орлого төвлөрүүлээд явах боломжтой төсөл.

Сүүлийн нэг жил гаруйн хугацаанд эрчим хүчний салбарт үнэ тарифын чөлөөлөлт салбарыг либералчлах бодлого маань энэ бондыг гаргах боломжийг бүрдүүлж байна.

Орон нутгаас Өмнөгоюь аймаг төсөвт үнэмлэхүй хэмжээний орлого төвлөрүүлдэг.  Энэ жил 1.7 их наяд төгрөг улсын төсөвт төвлөрүүлж байгаа. Энэ жишгээрээ цаашдаа орлого нь өсөөд явах юм бол  ирэх 5 жилд 8 их наяд төгрөгөөс давсан орлого улсын төсөвт төвлөрүүлэх бүрэн боломжтой.

Бондын хэмжээ 500 тэрбум, гурваас  таван жилийн хугацаатай. Шалгуураа бүрэн хангаж байгаа учраас дулааны цахилгаан станцыг санхүүжүүлэх бондыг дэмжсэн. Цаашдаа УИХ-д өргөн баригдаад эцсийн шийдвэр гарна.

Хоёр дахь чухал шийдвэрлэсэн асуудал бол Улсын нэгдсэн III эмнэлгийн дэргэд зүрх судасны бие даасан төв байгуулахаар боллоо. Олон жил яригдсан асуудал. Нийтдээ 56.3 сая ам.долларын өртөгтэй, орчин үеийн шаардлага хангасан эмнэлэг баригдахаар боллоо. Үүний 32.9 сая ам.доллар нь Европын сэргээн босголт хөгжлийн банкнаас 22, 4 сая ам.доллар нь Люксенбургийн вант улсын буцалтгүй тусламж байх юм.  Нийт санхүүжилтийн гуравны нэг нь буцалтгүй тусламжаар хийгдэж байгаагаараа онцлогтой.

Эрүүл мэндийн яам болон Улсын нэгдсэн III эмнэлэг сүүлийн 10 гаруй  жилийн хугацаанд Люксенбургийн вант улстай зүрх судасны чиглэлээр гурван төслийг амжилттай хэрэгжүүлсэн. Үр дүн сайн гарсан тул буцалтгүй тусламжийн хэмжээг нэмэгдүүлж, хамтарсан санхүүжилтээр эрүүл мэндийн салбарт өмнө нь хийгдэж байгаагүй хөрөнгө оруулалт хийхээр шийдвэрлэсэн байдаг. Гурван жилийн хугацаанд хэрэгжинэ. Барилгын ажил, тоног төхөөрөмж, эмч, эмнэлгийн ажилтнуудыг сургах төсөл хөтөлбөрүүд бүгд багтсан, цогц хөтөлбөр хэрэгжихээр болж байна.

Г.ХОРОЛ