Хиймэл оюун ухааны стартап компани "Perplexity" технологийн аварга "Google" компанийн "Chrome" хөтчийг худалдаж авах санал тавьжээ. "Perplexity" Мягмар гаригт (2025.08.12) мэдэгдэхдээ,"Chrome" хөтчийг худалдаж авахын тулд 34.5 тэрбум ам.долларын санал тавьсан. Энэхүү санал нь АНУ-ын шүүхээс "Chrome"-ийн хайлтын системийн зах зээл дэх монополийн асуудлаар шийдвэр гаргахаас өмнөхөн гарч ирж буй юм. Тус улсын Хууль зүйн яам 2020 онд "Google"-ийг онлайнаар хайлтын үйлчилгээ үзүүлэхдээ өрсөлдөөний эсрэг хууль зөрчсөн хэмээн шүүхэд өгсөн.

Өнгөрсөн жил "Google"-ийг мөн хайлтын зах зээлийг хууль бусаар эзэгнэсэн гэж үзсэн бөгөөд энэ сарын сүүлээр өрсөлдөөнийг хэрхэн сэргээх талаар шийдвэр гаргах төлөвтэй байна.

"Perplexity" мэдэгдэлдээ “Манай санал нь Chrome хөтчийг үргэлжлүүлж, ил тод, хэрэглэгчийн эрх ашгийг хамгаалсан бие даасан, чадвартай операторт шилжүүлэх замаар хамгийн олон нийтийн эрх ашигт нийцсэн өрсөлдөөний эсрэг зохицуулалт хийхэд чиглэсэн” гэж мэдэгджээ. АНУ-ын хэвлэл мэдээллийн хэрэгслүүдийн мэдээлснээр, "Google" "Chrome" хөтчийг зарах сонирхлоо илэрхийлээгүй байна.