Мексикийн засгийн газар Трампын засаг захиргаатай байгуулсан гэрээний хүрээнд хар тамхины бүлэглэлүүдийн 26 удирдагчийг АНУ-д шилжүүлэн өгсөн байна.  Энэ нь АНУ-ын эрх баригчид хилээр хар тамхи оруулж ирж буй гэмт хэргийн сүлжээнүүдийн эсрэг шахалтаа улам нэмэгдүүлж байгаатай холбоотой юм. Картелийн эдгээр удирдагчдыг Мягмар гаригт (2025.08.12) онгоцоор АНУ руу хүргэсэн байна. Шилжүүлэн өгөгдсөн хүмүүсийн дунд Лос Күинис хэмээх бүлэглэлийн удирдагч Абигаэль Гонсалес Валенсиа багтжээ. Энэ бүлэглэл нь Мексикийн хамгийн аюултай картелиудын нэг болох "CJNG" (Халискогийн Шинэ Үеийн Картель)-тэй нягт холбоотой. Мөн Роберто Салазар гэх хүн нь 2008 онд Лос Анжелес Каунтийн шерифийн орлогчийг хөнөөсөн хэргээр АНУ-д эрэн сурвалжлагдаж байсан байна.

Мексикийн Ерөнхий прокурорын газар болон Аюулгүй байдлын яам эдгээр шилжүүлэн өгөлтүүдийг үнэн болохыг баталсан. Тус улсаас шилжүүлэн өгсний хариуд АНУ-ын Хууль зүйн яам яллагдагч нарт цаазаар авах ял төлөвлөхгүй гэж амласан байна.

Мексик улс энэ онд хоёр дахь удаагаа картелийн гишүүн, удирдагчдыг шилжүүлэн өгч байна. Өмнө нь, хоёрдугаар сард Мексик 29 картелийн гишүүн, тэдгээрийн дунд АНУ-ын Мансууруулах бодисын эсрэг агентлагийн (DEA) ажилтныг 1985 онд хөнөөсөн Рафаэль Каро Кинтеро-г шилжүүлсэн. Тухайн үед АНУ Мексикийн импортын бараанд 25 хувийн татвар ногдуулах гэж байсан ч энэхүү шилжүүлэлтийн дараа татварыг түр хойшлуулсан юм. Үүнтэй адил Мягмар гаригт картелийн удирдагчдыг шилжүүлэн өгснөөр Мексикт ногдуулах шинэ 30 хувийн тарифыг АНУ 90 хоногоор хойшлуулах боллоо.

Мексикийн ерөнхийлөгч Шейнбаум өмнөх үеийн ерөнхийлөгчдөөс ялгаатай нь хар тамхины картелийн эсрэг илүү идэвхтэй ажиллаж буй. Гэхдээ тэрбээр Мексикийн бүрэн эрхт байдалд анхаарч, АНУ-ын цэргийн оролцоог эрс эсэргүүцэж байгаагаа илэрхийлсэн хэвээр байна.

Трампын засаг захиргаа хар тамхины картельтэй тэмцэхийг гол зорилтоо болгосон бөгөөд "CJNG" болон Латин Америкийн долоон бүлэглэлийг гадаадын террорист байгууллага гэж нэрлэсэн. Абигаэль Гонсалес Валенсиа нь "CJNG"-ийн толгойлогч Немесио “Эль Менчо” Осеуэра Сервантесийн хадам ах бөгөөд АНУ-ын засгийн газрын хамгийн их эрэн сурвалжилж буй хүмүүсийн нэг юм. Түүнийг 2015 оны хоёрдугаар сард Жалиско мужийн Пуэрто Валлартад баривчилсан бөгөөд өдийг хүртэл АНУ-д шилжүүлэгдэхээс зайлсхийж ирсэн аж. Абигаэль ах нартайгаа хамтран "CJNG"-ийг байгуулж, дэлхийн хамгийн хүчирхэг, харгис картелиудын нэг болгон өсгөсөн. "CJNG" нь АНУ болон бусад улс руу асар их хэмжээний кокаин, метамфетамин, фентанил зөөвөрлөдөг бөгөөд туйлын хэрцгий, авлигын хэрэгт холбогддог. Түүний нэг ах Хосе Гонсалес Валенсиа нь 2017 онд анхны Трампын засаг захиргааны үед Бразилын амралтын газар хуурамч нэр ашиглан аялж байхдаа баривчлагдсан. 2025 оны зургадугаар сард тэрбээр АНУ-ын шүүхээс интернациональ кокаины наймааны хэрэгт буруутгагдан 30 жилийн хорих ял сонссон байна.