Монгол Улс 2025 оны эхний 7 сард нийт 152 улстай худалдаа хийж, гадаад худалдааны нийт бараа эргэлт 14.2 тэрбум ам.долларт хүрсэн байна. Үүнээс экспорт 7.8 тэрбум ам.доллар, импорт 6.5 тэрбум ам.долларт хүрч, тэнцэл 1.3 тэрбум ам.долларын ашигтай гарчээ.

Гэсэн ч нийт бараа эргэлтийн хэмжээ 2024 оны мөн үеэс 9.2 хувь, экспорт 16.4 хувь, тэнцэл 55.5 хувиар тус тус буурсан байна. 

Харин импорт 68.9 сая ам.доллар буюу 1.1 хувиар өсчээ. Импорт нэмэгдсээр тансаг зэрэглэлийн худалдан авалтад валютыг гадагшаа урсгаж байгааг Төв банкны зүгээс шүүмжилдэг. Иймд валютын нөөцийг хадгалах, ханшийг тогтвортой барих нэг арга нь тансаг зэрэглэлд багтах автомашины импортыг түр хязгаарлах хэмээн үздэг. Гэсэн ч Монгол Улсад хилээр орж ирэх автомашины тоо жилээр бус сараар өндөр өсөлттэй гарч байгаа. 

Импортын 38.1 нь БНХАУ-д, 23.6 хувь нь ОХУ-д, 12.7 хувь нь Японд, 4.1 хувь нь АНУ-д, 4.3 хувь нь БНСУ-д, ХБНГУ-д 2.5 хувь нь тус тус ногдож байгаа нь нийт импортын дүнгийн 85.4 хувийг эзэлж байна.

Харин эдгээр голлох түнш улсуудийн буюу ОХУ–аас импортолсон барааны 71.7 хувийг нефтийн бүтээгдэхүүн, Япон Улсаас импортолсон барааны 80 хувийг суудлын автомашин, БНХАУ–аас импортолсон барааны 8.2 хувийг ачааны автомашин тус тус эзэлж байна. Тухайлбал, 1501-4500 см3 хөдөлгүүрийн багтаамжтай суудлын автомашины нийт суудлын автомашины импортын 92 хувийг эзэлжээ. 

Автомашины импорт ийнхүү өсч байгаа нь түгжрэлд нөлөөлөх төдийгүй, агаар, орчны бохирдолд ч тодорхой хэмжээгээр нөлөө учруулна. Нийслэл хотын нэг өрхөд дунджаар 1.4 автомашин ногдож байна гэх судалгаа бий. Гэсэн ч цаашид иргэдийн амьдралд автомашины эрэлт буурахгүй, өсөх төлөвтэй байна.