АНУ-ын ерөнхийлөгч Дональд Трампын шинэ татварууд дахин олон улсын худалдааны гинжин хэлхээг ганхуулж байна. Түүний 90 гаруй оронд ногдуулсан импортын тариф наймдугаар сарын 7-ноос эхлэн хэрэгжиж буй. Их Британид 10 хувийн үндсэн тариф ногдуулснаас эхлэн Сирид 41 хувийн тариф тогтоож, Энэтхэг 50 хувийн нэмэгдэл төлөх эрсдэлтэй болсон. Энэ мэтчилэн Трампын засаг захиргаа АНУ-ын сүүлийн 100 жилийн түүхэнд байгаагүй тарифыг тогтоогоод байна. Гэхдээ эдгээр тарифыг гадаадаас бараа, бүтээгдэхүүн импортолж байгаа Америк компаниуд төлнө. Трампын хувьд татвар нэмэх нь ашигтай мэт санагдаж магадгүй ч түүний төсөөлсөн үр дүнд хүрэхэд олон америкчууд халааснаасаа илүү мөнгө гаргах болж байна. Энэ талаар "Дэлхийн эдийн засаг" буландаа онцолж байна.

АНУ-ЫН ЗАСГИЙН ГАЗАРТ ТАРИФЫН ОРЛОГО 

Йелийн их сургуулийн Төсвийн лабораторийн тооцоолсноор 2025 оны наймдугаар сарын 7-ны байдлаар АНУ-ын импортын бараа бүтээгдэхүүнд ногдуулсан дундаж тарифын ашиг орлогын хувь хэмжээ 18.6 хувь буюу 1933 оноос хойших хамгийн өндөр түвшинд хүрсэн байна. Энэ нь 2024 онд Дональд Трампыг албан тушаалдаа буцаж ирэхээс өмнөх үеэс 2.4 хувиар өссөн үзүүлэлт юм. Өөрөөр хэлбэл, тухайн мэдэгдэхүйц өсөлт нь АНУ-ын засгийн газрын татварын орлого нэмэгдсэн гэсэн үг юм. Тус улсын засгийн газрын санхүүгийн байдалд дүн шинжилгээ хийдэг нам бус бүлэг болох Конгрессын Төсвийн алба (CBO) зургадугаар сард энэ оны нэгдүгээр сарын 6-аас тавдугаар сарын 13-ны хооронд АНУ-аас тогтоосон шинэ тариф нь  засгийн газарт илүү их мөнгө авчрах болно гэж тооцоолсон. Энэхүү нэмэлт мөнгө нь засгийн газрын зээл авах шаардлагатай хэмжээг ирэх 10 жилд 2.5 их наяд ам.доллараар бууруулж чадна гэж тэд үзэж байна. Гэхдээ "CBO" эдгээр тарифууд нь АНУ-ын эдийн засагт сөргөөр нөлөөлнө гэж үзэж байгаа юм. Учир нь татварын дарамт импортын бараа бүтээгдэхүүнд борлуулагчдад хүндээр нөлөөлж, дампуурах эрсдэлд унагаж болзошгүй. Улмаар эдийн засгийн өсөлт удаашрах юм.

АНУ-ЫН ХУДАЛДААНЫ АЛДАГДАЛ НЭМЭГДЭЖ БАЙНА

Хэрэв АНУ бусад орноос зарж байгаагаасаа илүү ихийг худалдаж авбал эдгээр орнууд Америкийн давуу талыг ашиглаж байна гэж Трамп үзэж буй. Улмаар импортын тариф нэвтрүүлсэн гол шалтгаануудын нэг нь импортыг бууруулах, экспортыг нэмэгдүүлэх, худалдааны тэнцвэргүй байдлыг засах явдал байв. Гэвч өнөөг хүртэл Трампын хүлээсэн үр дүн биеллээ олсонгүй. Харин ч эсрэгээрээ алдагдалд орж байгаа бололтой. АНУ-ын компаниуд импортын хэмжээгээ бууруулахын оронд тариф хэрэгжиж эхлэхээс өмнө илүү их бараа нөөцөлсөн. Ерөнхийдөө АНУ-ын худалдааны алдагдал буюу импорт, экспортын зөрүү нь илүү ихсэж, 2025 оны гуравдугаар сард 162 тэрбум ам.долларт хүрч, дээд амжилт тогтоожээ. Зургадугаар сард 86 тэрбум ам.доллар болж буурсан ч өмнөх өсөлт нь ихэвчлэн бараагаа нөөцөлж байгаа компаниудаас шалтгаалсан байна.