АНУ-ын Цагаачлал ба Гаалийн хэрэг эрхлэх газар (ICE)-т 1993–1997 онд "Lois & Clark" цувралд Супермэнийн дүрд тоглосон Дин Кейн ажиллах болсноо зарласан байна. Кейн хэдийн шерифийн орлогч, нөөц цагдаагийн албыг хашиж байгаа бөгөөд ICE-д ирэх сард элсэж, тангаргаа өргөх юм байна. "ICE" нь Дотоодын аюулгүй байдлын яамны харьяа бөгөөд цагаачлалын хууль сахиулах, албадан гаргах ажиллагаа явуулдаг. Трампын засаг захиргаа жилд нэг сая хүнийг албадан гаргах зорилт тавин ажиллаж байна.

Саяхан ICE нь 10 мянган шинэ ажилтан авах томоохон элсэлтийн аян эхлүүлжээ.

Тодруулбал, албадан гаргах ажилтан, мөрдөгч, өмгөөлөгчид зэрэг элсүүлнэ. Мөн тус байгууллага 50 мянган ам.доллар хүртэл урамшуулал, оюутны зээлийн тусламж санал болгож байгаа бөгөөд аль хэдийн 80 мянга гаруй хүн өргөдөл гаргаад байна. Дашрамд, "ICE" ажил горилогч татахын тулд дэлхийн II дайны үеийн зар сурталчилгаатай төстэй, “Америкт чи хэрэгтэй” болон “Эх орноо хамгаал” гэх уриатай, мөн "Uncle Sam", Дональд Трамп болон бусад албан тушаалтны зурагтай постерууд гаргажээ.

"ICE" одоогоор АНУ даяар 400 салбар бүхий 20 мянга орчим ажилтантай.

Трампын гарын үсэг зурсан шинэ төсвийн хуулиар тус байгууллагад 76 тэрбум ам.доллар хуваарилсан. Энэ нь өмнөхөөсөө бараг 10 дахин их бөгөөд холбооны хууль сахиулах байгууллагууд дундаа хамгийн өндөр төсөвтэй болж байна.