Богд хааны Хүрэн ордон буюу Хайстайн лаврин гэх түүхэн дурсгалт барилгын зүүн талд амины орон сууц барьж эхэлсэн байна. Энэхүү газарт өнөөдөр /2025.08.07/ Нийслэлийн Засаг даргын нэгдүгээр орлогч Т.Даваадалай, Нийслэлийн ерөнхий архитектор Ч.Төгсдэлгэр нар ажиллаж, Соёлын өвийн тухай хуульд заасны дагуу тухайн газрыг чөлөөлж, А даалгаврыг хүчингүй болгох болсноо эзэмшигчид мэдэгдлээ.

О.Баасандорж нь тухайн газрыг худалдан авсан бөгөөд 2023 онд А даалгавар авсан юм байна. Гэвч Соёлын өвийн тухай хуульд зааснаар түүхэн дурсгалт газарт 100 метрээс 3 км газарт барилга барихыг хориглодог. Мөн газрыг худалдан авсан О.Баасандорж нь холбогдох хуульд заасны дагуу зохих зөвшөөрлүүдийг авалгүйгээр барилгын ажлыг эхлүүлсэн зэрэг зөрчил ч гаргажээ. Иймээс холбогдох хууль, журамд заасны дагуу тухайн өв соёлын газрыг улсын хамгаалалтад авч, чөлөөлөх болно гэдгээ энэ үеэр албаныхан мэдэгдлээ.

Сануулахад, Нийслэлийн Засаг даргын 2007 оны 523 дугаар захирамжаар Хан-Уул дүүргийн 11-р хорооны нутаг дэвсгэр дэх 700 м2 газар (Богд хааны Хүрэн ордны хажуу талын)-ыг гэр бүлийн хэрэгцээний зориулалтаар иргэнд өмчлүүлсэн байдаг. Энэ шийдвэр хуульд нийцэж байгаа эсэхийг шалгаж, хууль зөрчсөн албан тушаалтныг хуулийн байгууллагад шилжүүлж ажиллахыг Ерөнхий сайд өчигдөр Улаанбаатар хотын удирдлагуудад үүрэг болгосон юм.

Г.ХОРОЛ