Засгийн газрын өнөөдрийн /2025.08.06/ хуралдаанаас гарсан шийдвэрийг танилцууллаа.

Төрийн өмчийн бодлого, зохицуулалтын газрын дарга Б.Цэнгэл:

-Монгол Улсын 2024-2028 оны үндсэн чиглэлд төрийн өмчит 20 компанийг багтааж, эдгээрээс Эрдэнэт үйлдвэр, Эрдэнэс тавантолгой, Эрчим хүчний 11 компанитай ажиллах талаар мэдээлэл өглөө. Төрийн өмчит компаниудаас 3.74 их наяд төгрөг төвлөрүүлэх боломжтой гэж үзэж байна. Тиймээс ТӨХК-иудын засаглалыг сайжруулж, үр өгөөжийг нэмэгдүүлэх хүрээнд 17 компанийг цөөлөх, 9 компанийг татан буулгаж нэгтгэх саналыг Засгийн газарт танилцуулсан.

Тухайлбал, Тайшир болон Орхон-Сэлэнгийн цахилгаан станцуудыг нэгтгэхийг санал болгосон Төрийн өмчит компаниуд толгой болон охин компаниудтайгаа нийлээд нийт 109 байсныг 87 болгон бууруулах төлөвлөгөөтэй байна. ТӨХК-иудын захирлуудын цалин хамгийн өндөр нь сарын 30 сая төгрөг байна. Тиймээс үндсэн цалин нь өндөр биш үр дүнгийн урамшуулал нь өндөр байлгах өөрчлөлтийг хийнэ. Гүйцэтгэлээр урамшууллыг үнэлэх талаар судалгаа дуусах шатандаа орсон.

Тухайлбал, Эрдэнэс Монгол, Хөдөө аж ахуйн биржийн захирлуудын цалин харьцангуй өндөр байна.

ТӨХК-иудад ойролцоогоор 59 мянган хүн ажиллаж байна. Үүний цаана олон хүний амьдрал бий. Тиймээс ТӨХК-иудад ялгамжтай бодлого явуулна. Хамгийн гол нь чиг үүргийн давхардал, орон тооны асуудлуудыг анхаарч ажиллана. Ингэснээр зардлыг хэмнэх боломжтой гэж үзэж байна.

Цахим хөгжил инновац, харилцаа холбооны сайд Э.Батшугар:

-Өнөөдрийн байдлаар дунжаар 1.2 тэрбум и-баримт хэвлэгддэг. Үүний 40 орчим хувь нь л шивэгддэг гэсэн судалгаа бий. Тиймээс цаасан баримтыг халах ажлыг өнөөдрийн Засгийн газрын хуралдаанд танилцуулж, шийдвэрлэлээ. Ингэснээр иргэд банкны аппликэйшн рүү гээ ороод сонгосон картаа и-баримттай холбох байдлаар өөрчлөлт хийх юм. Дурын банкны картаа И-баримттайгаа холбож, тухайн картаараа худалдан авалт хийхэд и-баримт автоматаар бүртгэгддэг болно.

Үүний үр дүнд буцаан олголт нэмэгдэх боломжтой. Ерөнхий сайдын НӨАТ-ын буцаан олголтыг 5 хувь болгох ажилтай уялдана гэж хэлж болно.

Мөн сугалаанд хожих магадлал өсөх, экологид эерэг нөлөө үзүүлэх гэх мэт давуу талтай.  Тус ажил ирэх сарын эхний долоо хоногт хэрэгжиж эхэлнэ.

УЦУОШГ-ын дарга Э.Баттулга: 

-УЦУОШГ-т бүтцийн өөрчлөлт хийсэн. Манай байгууллага 21 аймгийн 318 суманд салбар, нэгжтэй. Нийт 1893 хүн ажилладаг. Эдгээрээс нийт 171 ажилтанд цомхотгол хийсэн. Төсвийн тодотголоор манай байгуулгын төсөв 80.4 тэрбум төгрөг байсныг 77.3 тэрбум төгрөг болгож бууруулсан.

Бид цомхотгол хийхдээ 21 аймгийн төвүүдээс санал авсан. Үүн дээр тусгай ажлын хэсэг ажилласан. Цомхотгол хийхдээ нэгдүгээрт анхан шатны ажилтны орон тоог цөөлөхгүй байх бодлого барьсан. Хоёрдугаарт удирдах албан тушаалтны тоог цөөлөх буюу нэг төв гурван дарга хэлтсийн даргатай байсныг нэг болгож цомхотгосон. Мөн бүх төвүүд адилхан бүтэцтэй байх бодлого барьсан буюу бүгд ижил бүтэцтэй байхаар зохицуулалт хийсэн.

Энэ ямар нэгэн хүний тухай асуудал биш, бүтцийн тухай асуудал гэв.