Жил бүрийн наймдугаар сард хичээл сургууль эхлэхтэй холбоотойгоор орон сууцны түрээсийн үнэ оргилдоо хүрдэг билээ. Орон сууц түрээслүүлэх үнэ ханш эрэлт, нийлүүлэлт дээр л тогтдог. Улаанбаатар хотын түгжрэлээс үүдэн хотын төвийн ойролцоох байрнуудын эрэлт жилээс жилд өсч байна. Орон сууцыг ашиглалтад орохоос нь өмнө буюу үнэ нь хамгийн хямд байхад нь худалдаж аваад, дараа нь өндөр үнээр түрээслүүлдэг явдал сүүлийн жилүүдэд ихэссэн. Гэхдээ энэ бол буруутгах зүйл биш.

Ингээд орон сууцны түрээсийн үнийг сонирхуулъя. “Unegui.mn”-д одоогийн байдлаар, үл хөдлөх хөрөнгө түрээслүүлэхтэй холбоотой 9235, орон сууц түрээслүүлэх тухай 4851 идэвхтэй зар байршсан байна. Тэдгээрээс хоёр өрөө байр түрээслүүлэх зар хамгийн их буюу 2055 байна. Харин таваас дээш өрөө байр түрээслүүлэх зар хамгийн бага буюу 117 байна.

Өнгөрсөн жилийн мөн үетэй (2024.08 сар)-тай харьцуулахад:

• Нэг өрөө байр түрээслүүлэх үнэ байршлаасаа хамаарч 900000 төгрөгөөс эхэлж байсан бол одоо нэг саяас эхэлж байна.
• Хоёр өрөө байр 1.3-2.5 сая төгрөг байсан бол одоо 1.2-3.2 саяын хооронд болж өсчээ.
• Гурван өрөө 2-5 сая төгрөг байсан бол одоо 1.4-5 сая төгрөгийн хооронд буюу үнийн өсөлт харьцангуй тогтвортой байна.
• Дөрвөн өрөө 2.5-7 сая төгрөг байсан бол одоо 3.5-19.8 сая төгрөг болж үнэ өссөн үзүүлэлттэй байна.
• Таван өрөө өмнө нь 5-13 сая байсан ба одоо 6-15 сая болж, мөн адил өссөн дүр зурагтай байгаа аж.
• Хажуу өрөө 350-800 мянган төгрөг байсан бол одоо 200 мянгаас 1.2 саяын хооронд байгаа юм.

Харин цахим сүлжээнд нэг өрөө байр түрээслүүлэх дундаж ханш 1.5 сая орчим, хоёр өрөө байр түрээслүүлэх дундаж ханш хоёр сая орчим байгаа юм.

Түүнээс гадна, нэмээд маш олон шаардлагатай. Жишээлбэл, хосууд, бага насны хүүхэдтэй хүнд, эрэгтэй хүнд түрээслэхгүй гэх мэт. Үүнд тавих хяналт байхгүй учраас түрээслүүлэгчид дурын үнэ, шаардлагуудыг тавьдаг. Ингэж л жилээс жилд орон сууц түрээслэх ханш өсч байна

Нийгмийн статистикийн газрын статистик мэдээлэлд зургаан жилийн өмнө буюу 2019 онд хоёр өрөө байр түрээслүүлэх дундаж үнэ 648 мянган төгрөг байсан байна. Үүнээс үзэхэд, ердөө зургаахан жилийн дотор Улаанбаатар хотод хоёр өрөө орон сууц түрээслэх үнэ хоёр дахин өссөн үзүүлэлт гарчээ.

М.НАМУУН