ОХУ-ын -рөнхийлөгч Владимир Путин цагдаа нарт шүүхийн зөвшөөрөлгүйгээр ямар нэгэн хүний банкны дансыг царцаах эрхийг олгох шинэ хуулийн төсөлд гарын үсэг зуржээ. Засгийн газар үүнийг цахим гэмт хэрэг, санхүүгийн залилантай тэмцэх зорилготой гэж мэдэгдэж байгаа ч мэргэжилтнүүд хэт их эрх мэдэлтэй болж, иргэний эрхийг зөрчиж магадгүй гэж болгоомжилж байна.

Шинэ хуульд зааснаар, цагдаа нар хэргийн сэжиг байгаа тохиолдолд хүний банкны дансыг 10 хоногийн хугацаатай царцааж болно.

Ингэхдээ шүүхээс зөвшөөрөл авах шаардлагагүй. Мөрдөн байцаагчийн дарга болон прокурорын зөвшөөрөл байхад хангалттай. Мөн тухайн 10 хоногт багтааж шүүхэд хандаж, царцаах шийдвэрийг албан ёсоор батлуулах ёстой. Харин банк болон мөнгөний үйлчилгээ үзүүлэгч байгууллагууд иргэний данс болон гүйлгээний бүх мэдээллийг цагдаа нарт гурав хоногийн дотор, цахимаар ирүүлсэн бол 24 цагийн дотор өгөх үүрэгтэй.

Зарим эрх баригчдын зүгээс энэ хууль нь гэмт хэрэгт холбогдолтой мөнгийг түргэн царцаах, хохирогчдод нөхөн олговор олгох боломжийг сайжруулна гэж үзэж байна. Гэхдээ хуульчид тус шинэ хуулийг тодорхой бус гэж шүүмжилж байна. Учир нь ямар төрлийн гэмт хэрэгт хамаарах вэ гэдгийг тодорхой заагаагүй. Мөн царцаах мөнгөний хэмжээ, хохирлын дүнтэй нийцэх ёстой эсэх талаар ямар ч заалт байхгүй байгаа нь шүүмжлэл дагуулж байгаа юм.

Хуулийг ашиглан гэм зэмгүй иргэн, улс төрийн үзэл бодлоо илэрхийлсэн сэтгүүлч болон идэвхтнүүдийн дансыг шударга бусаар царцаах эрсдэлтэй гэж үзэж байна.

Орон нутгийн хэвлэлд мэдээлснээр, уг хууль энэ оны сүүлчээр хүчин төгөлдөр болно.