"Оросын ерөнхийлөгч асан Дмитрий Медведевийн өдөөн хатгасан шинжтэй мэдэгдлүүд дээр үндэслэн хоёр цөмийн шумбагч хөлөг онгоцыг тодорхой бүс нутагт байрлуулах тушаал өгсөн" гэж АНУ-ын ерөнхийлөгч Дональд Трамп Баасан гаригт (2025.08.01)  “Truth Social” цахим хуудсаараа дамжуулан мэдэгдсэн байна. Тэрбээр мөн "Тэр цөмийн зэвсгийн талаар ярьж байсан. Цөмийн тухай ярихад бид бэлэн байх хэрэгтэй. Бид бүрэн бэлэн" гэж онцлон тэмдэглэсэн байна.

Трамп цөмийн "зэвсэгтэй" шумбагч онгоц, эсвэл зөвхөн цөмийн "хөдөлгүүртэй" шумбагч онгоцыг байрлуулах тушаал өгсөн эсэх нь тодорхой биш байна.

АНУ-ын Батлан хамгаалах яам цөмийн чадавхтай холбоотой хөдөлгөөнийг нууцалдаг тул Трампын мэдэгдлийг батлах боломж бараг үгүй юм. Өнгөрсөн хэдэн өдрийн турш цахим сүлжээгээр Трамптай маргалдаж байсан Медведев Пүрэв гаригт Трампыг “Үгээ бодож хэл” хэмээн сануулсны дараа Зөвлөлтийн үед бий болсон Оросын автомат хариу цөмийн цохилтын чадавхын талаар дурдсан юм.

Мөн тэрбээр "Telegram" хуудсандаа “Хэрэв Оросын экс ерөнхийлөгчийн хэлсэн зарим үгс АНУ-ын эрхэм дээд ерөнхийлөгчийн бухимдлыг төрүүлбэл Орос бүх зүйлийг зөв хийж байгаа гэсэн үг. Бид цаашид өөрийн замаар замнах болно” хэмээн бичсэн байна.

Тэрбээр  Оросын цөмийн зэвсгийн удирдлагын төвийг устгасан тохиолдолд цөмийн пуужингуудыг хөөргөх зориулалттай Зөвлөлтийн үеийн нууцлаг, хагас автомат командын системийг дурджээ. Энэ нь Орос улс АНУ-аас ялгаагүй хүчирхэг цөмийн зэвсгээ ашиглаж чадна гэх сүрдүүлэг гэж ажиглагчид үзэж байна.