Этиоп улсын ерөнхий сайд Абий Ахмед 2019 онд “Ногоон өв” нэртэй үндэсний хөтөлбөрийг санаачилжээ. Энэ хүрээнд тус улсын иргэд нэг өдрийн дотор 700 сая мод тарьсан тухайгаа Пүрэв гаригт (2025.07.31) зарлалаа. “Ногоон өв” нь байгаль орчныг нөхөн сэргээх, хамгаалах зорилготой зөвхөн нэг удаагийн кампанит ажил биш, харин соёлыг төлөвшүүлэх тухай гэж Абий Ахмед өөрийн цахим хуудсаараа дамжуулан мэдэгджээ.

Мөн цаашид борооны улирал дуусахаас өмнө 48 тэрбум мод тарих зорилт тавин ажиллаж байна. “Ногоон өв” санаачилга нь олон улсын анхаарлыг татаж, жил бүр гадаадын улс орнуудын удирдагч, дипломат төлөөлөгчид оролцдог болжээ. Энэ жилийн арга хэмжээнд НҮБ-ын Хүнсний асуудлаарх дээд хэмжээний уулзалтын төлөөлөгчид болох Италийн Ерөнхий сайд Жоржиа Мелони, Кенийн ерөнхийлөгч Уильям Руто, Сомалийн ерөнхийлөгч Хассан Шейх Мохамуд нар мод тарих үйл ажиллагаанд нэгдэж, өндрөөр үнэлжээ.