Хятад, Монголын батлан хамгаалахын хамтын ажиллагаа улам гүнзгийрч байна. Тодруулбал, Пүрэв гаригт (2025.07.31) БНХАУ-ын Ардын Чөлөөлөх Арми (АЧА) байгуулагдсаны 98 жилийн ой, мөн Хятадын ард түмний Японы түрэмгийллийг эсэргүүцэх дайнд болон дэлхийн фашизмыг эсэргүүцэх дайнд ялалт байгуулсны 80 жилийн ойн хүндэтгэлийн хүлээн авалт БНХАУ-аас Монгол Улсад суугаа Элчин сайдын яаманд ёслол төгөлдөр болж өнгөрлөө.

Энэхүү арга хэмжээнд Монгол Улсын Батлан хамгаалах яамны Төрийн нарийн бичгийн дарга, хошууч генерал Д.Ганхуяг, БНХАУ-аас Монгол Улсад суугаа Элчин сайд Шэнь Миньжюань, Батлан хамгаалахын атташе, ахлах хурандаа Жан Сюлян тэргүүтэй хоёр улсын зэвсэгт хүчний төлөөлөгч, ахмад дайчин, дипломат ажилтнууд болон нэр хүндтэй зочид оролцсон нь арга хэмжээний ач холбогдлыг улам тодотгож байв.

ТҮҮХЭН БАХАРХАЛ, БААТАРЛАГ ТЭМЦЛИЙН ДУРСАМЖ

Хүлээн авалтыг нээж Элчин сайд Шэнь Миньжюань хэлсэн үгэндээ “Хятадын Ардын Чөлөөлөх Арми нь өнгөрсөн 98 жилийн хугацаанд Хятадын ард түмнийг чөлөөлөх, улс орны тусгаар тогтнол, бүрэн эрхт байдлыг хамгаалах, дэлхийн энх тайвныг сахин хамгаалахад үнэлж баршгүй хувь нэмэр оруулсан” хэмээн онцоллоо. Тэрбээр АЧА нь "үгүйгээс үүсэн бий болж, сул доройгоос хүчирхэг болсон" замналд Ши Жиньпин даргын “Хүчирхэг арми” үзэл баримтлал чиг баримжаа болон замчлагч болсон гэдгийг дурдсан юм.

Тэрбээр мөн Хятадын ард түмэн 14 жилийн туршид үргэлжилсэн цуст тэмцлийн эцэст Японы түрэмгийллийг эсэргүүцэх дайнд ялалт байгуулсан нь зөвхөн нэг үндэстний хувь тавилан бус, хүн төрөлхтний энх тайвныг хамгаалсан түүхэн эргэлт байсныг тэмдэглэв.

Ялангуяа Хятад, ЗХУ, Монголын хамтарсан цэргийн ажиллагаа, Жанжякоу хотод сүндэрлэн буй ялалтын хөшөө нь уг нөхөрлөлийг мөнхжүүлэн гэрчилж буйг онцолж байв.

Түүнчлэн “Тайвань нь Хятадын салшгүй хэсэг байсан, хэвээрээ байгаа, байх ч болно” хэмээн тэмдэглэж, олон улсын дэг журмын хүрээнд Хятадын бүрэн нэгдмэл байдлыг хөндөх аливаа үйлдлийг эрс эсэргүүцэж буй байр сууриа дахин нотолсон юм.

ХОЁР ОРНЫ НӨХӨРЛӨЛИЙН БЭЛГЭДЭЛ

Монгол Улсын Батлан хамгаалах яамны Төрийн нарийн бичгийн дарга, хошууч генерал Д.Ганхуяг хэлсэн үгэндээ Монголын Зэвсэгт хүчний нэрийн өмнөөс Хятадын талд баярын мэндчилгээ дэвшүүлж, хоёр орны батлан хамгаалахын хамтын ажиллагааны түүхэн агуулгыг эргэн санууллаа.

“Монгол, Хятад хоёр улс уул усаар холбогдсон найрсаг хөршүүдийн хувьд түүхийн ээдрээт он жилүүдийг хамтдаа туулсан. Өнөөдөр бид хоёр улсын харилцааг гүн гүнзгий ойлголцол, харилцан хүндлэл, ашиг сонирхлын тэнцвэрт байдалд тулгуурлан улам хөгжүүлж байна” хэмээн онцлов.

Хошууч генерал Д.Ганхуяг “Хааны эрэлд” олон улсын энхийг сахиулах хамтарсан сургуулилтад Хятадын АЧА анх удаа салааны бүрэлдэхүүнээр оролцсон болохыг дурдсан. Түүнчлэн тус улсын зүгээс Монголын Зэвсэгт хүчинд үзүүлж буй техник, хүмүүнлэгийн тусламжийг өндрөөр үнэлж байгаагаа илэрхийлэв. Тэрбээр удахгүй БНХАУ-д болох Сяншаний форумын үеэр Батлан хамгаалахын сайд нарын уулзалт зохион байгуулагдаж, цаашдын хамтын ажиллагаанд чухал түлхэц өгнө гэдэгт итгэлтэй байгаагаа мөн илэрхийлсэн юм.

Батлан хамгаалахын атташе, ахлах хурандаа Жан Сюлян энэхүү тэмдэглэлт үйл явдлын үеэр хэлсэн үгэндээ, Хятад улс энх тайван, хамтын хөгжилд чиглэсэн батлан хамгаалах бодлогыг тууштай баримталж ирснийг онцолсон юм. Тэрбээр “Армийн шинэчлэлийг үргэлжлүүлэн гүнзгийрүүлж, олон улсын хариуцлагатай хүчин байх зорилт тавин ажиллаж байна” гэв.

Жан Сюлян “Хүчирхэг арми байгуулах” стратегийн хүрээнд Хятадын арми нь зөвхөн улсын тусгаар тогтнолыг хамгаалахаас гадна, дэлхий дахинд энх тайван, тогтвортой байдлыг дэмжих үүрэг хүлээж буйг тэмдэглэв.

Тэрбээр “Даян дэлхийн гурван санаачилга”, “Хүн төрөлхтний хувь заяаны хамтын нийгэмлэг” зэрэг Ши Жиньпин даргын үзэл санаануудыг хэрэгжүүлэхэд Хятадын Зэвсэгт хүчин бэлэн байна гэдгийг илэрхийлсэн юм.

СТРАТЕГИЙН ТҮНШЛЭЛ УЛАМ ГҮНЗГИЙРНЭ

Энэхүү арга хэмжээний хүрээнд хоёр тал хоорондын харилцаа, ялангуяа цэргийн салбарын хамтын ажиллагаа нь зөвхөн харилцан итгэлцэл дээр үндэслэж буй төдийгүй, бүс нутгийн энх тайван, тогтвортой байдлыг хангахад чиглэж буй нь тодорхой байлаа.

Монгол Улсын Ерөнхийлөгч У.Хүрэлсүхийн ирэх наймдугаар сард БНХАУ-д хийх айлчлал болон Шанхайн хамтын ажиллагааны байгууллагын дээд хэмжээний уулзалт нь хоёр орны стратегийн харилцаанд шинэ хуудсыг нээж, олон улсын түвшинд хамтын ажиллагааны цар хүрээг улам тэлэх болно гэдэгт талууд итгэлтэй байгаагаа илэрхийлэв. Энэхүү түүхэн ойг хамтдаа тэмдэглэснээр хоёр орны зэвсэгт хүчний хамтын ажиллагаа нь зөвхөн бодит үр дүнтэй төдийгүй, энх тайван, хөгжил дэвшлийг эрхэмлэсэн ирээдүйн суурийг тавьж буйг хүлээн авалтад оролцогч талууд санал нэгтэйгээр илэрхийллээ.

Хятад, Монголын батлан хамгаалах хамтын ажиллагаа нь зөвхөн бүс нутгийн бус, дэлхий дахины энх тайвны үйл хэрэгт бодит хувь нэмэр оруулах боломжтой стратегийн чухал түншлэл гэж хуран цугласан олон үзэж байна.