Цагаан ордон 200 сая ам.долларын үнэ бүхий шинэ бүжгийн танхим барихаар төлөвлөж байгаагаа зарлалаа. Шинэ бүжгийн танхимыг Цагаан ордны шинэчилсэн зүүн жигүүртэй зэрэгцүүлэн барих болжээ. Одоогийн байдлаар тус танхимд тэргүүн хатагтай Меланиа Трампын оффис болон Цагаан ордны бусад чухал албан тушаалтнууд байрладаг.

Трамп болон бусад нэрээ нууцалсан хандивлагчид шаардлагатай мөнгийг шууд хандивлах бөгөөд барилгын ажил есдүгээр сард эхэлнэ гэж хэвлэлийн нарийн бичгийн дарга Каролин Левитт мэдэгдэв.

Трамп Цагаан ордонд маш сайхан бүжгийн танхим барина гэж удаа дараа амлаж байсан бөгөөд 2016 онд Барак Обамагийн засаглалын үед 100 сая доллар төлөхийг санал болгосон. Гэвч татгалзсан хариу сонссон байдаг. Цагаан ордонд Пүрэв гаригт (2025.07.31) болсон хэвлэлийн бага хурал дээр Левитт хэлэхдээ, Цагаан ордонд маш хэрэгтэй, тансаг зэрэглэлийн нэмэлт бүжгийн танхим нь ойролцоогоор 8,360 м2 бөгөөд 650 орчим хүний суудалтай байх болно. Одоогийн байдлаар Цагаан ордны олон албан ёсны арга хэмжээнүүд тус ордны зүүн жигүүрт 200 орчим хүний суудалтай танхимд зохион байгуулагддаг байна.

"Ерөнхийлөгч Трампын Цагаан ордон ирээдүйн засаг захиргаа болон ирэх үеийн Америкчуудад таалагдах сайхан танхимыг барихын зэрэгцээ Цагаан ордны онцгой түүхийг хадгалахын тулд зохих байгууллагуудтай хамтран ажиллахыг бүрэн эрмэлзэж байна" гэж АНУ-ын ерөнхийлөгчийн штабын дарга Сюзи Уайлс мэдэгджээ.