Өнгөрсөн оны аравдугаар сард 3380 орчим төгрөг байсан ам.долларын ханш өнөөдрийг хүртэл тогтмол өсч 3600 төгрөгийг давсан. Энэ хэрээр төгрөгийн ханш унаж, эдийн засаг хүнд эрсдэлд байна. Найман шарга валют арилжааны захад долдугаар сарын 31-ний өдрийн байдлаар ам.долларын худалдан авах үнэ 3602 төгрөг, худалдах үнэ 3610 төгрөгтэй тэнцэж байна. Гэтэл одоогоос нэг жилийн өмнө буюу 2024 оны наймдугаар сарын 1-нд ам.долларын төгрөгтэй тэнцэх ханш 3375 төгрөг байв. Үүнээс харахад сүүлийн 10 сарын хугацаанд ам.долларын ханш төгрөгийн эсрэг 200 гаруй төгрөгөөр чангарчээ. Өөрөөр хэлбэл, 2024 оны УИХ-ын сонгууль болон орон нутгийн сонгуулийн дараа валютын ханш тогтмол өссөн. Үүнийг эдийн засагчид ингэж тайлбарлав.

“Өнгөрсөн жил УИХ, орон нутгийн сонгуулиуд болж төсвийн зардал нэлээд тэлсэн. Төсвийн зардлын тэлэлт эдийн засагт дарамт болсон. Үүний нөлөө гарч байгаа гэж харж байна. Цаашдаа ам.долларын ханш өссөн хэвээр байвал иргэдийн худалдан авах чадварт сөргөөр нөлөөлнө. Өөрөөр хэлбэл, импортын болон дотоодын бараа бүтээгдэхүүний үнэ өснө. Үүнийг дагаад иргэдийн амьжиргааны түвшин буурсаар байх болно. Цаашид ам.долларын ханш өсөх, өсөхгүй нь экспортын бараа бүтээгдэхүүнээс ерөнхийдөө хамаарна гэсэн юм.

Харин еврогийн хувьд энэ оны зургадугаар сараас хойш худалдах үнэ нь 80 орчим төгрөгөөр өссөн байна. Тодруулбал, евро 4095 төгрөгөөс 4175 төгрөг болж нэмэгджээ. Мөн юанийн ханш 505 төгрөг, рубль 45.1 төгрөг байгаа юм.  Ерөнхийдөө валютын ханш өсөлттэй тэр дундаа юань, евро хоёр ам.доллараас илүү өсөлттэй байна гэдгийг наймаачид хэлж байна.

Монгол Улсын гадаад валютын улсын албан нөөц зургадугаар сарын байдлаар 5.2 тэрбум байна.