Б.Батчулууны ном дахь хамгийн хачирхалтэй, “гаж” гэмээр бүлэг. Амиа бодохуйг хамгаалжээ. Нийгэмд хамаг сайн сайхныг хувь хүний өөрийгөө гэсэн сэтгэл, ө.х. амиа бодсон байдал авчирдаг аж. Хэчнээн дургүй хүрэм ч гэсэн юу үнэн гэвэл энэ л үнэн. Хамгийн парадокс зүйл гэвэл энэ мөн биз, аан?

Бүлэг эхлэхэд эгоизм, альтруизм хоёрыг сөргөлдүүлсэн зураг байна. Энэ ч яах вэ, ойлгомжтой. Энэ хачирхалтай бүлгээ Өөрийгөө золиослохуйн эсрэг өөрийгөө бодохуй хэмээн гарчиглажээ. Энэ “хачин” бүлгийн агуулга: Либертари үзэл дэх хамгийн хүнд сэдэв; Эгоизм ба альтруизм: өөрийгөө болон бусдыг бодохуйн талаарх социалист хийгээд либертари  тайлбар; Рациональ эгоизм буюу ухаалгаар өөрийгөө бодохуй; Монголчууд ба Өрнийн хүмүүсийн амиа бодохуй; “Эх сурвалж”-ийн Роарк; “Нийт нь нэгийн төлөө” биш, “Нэг нь нийтийн төлөө” бас биш, харин “Өөрөө, өөрийнхөө төлөө!”; Амжилт, алдаа хоёр бол хоёулаа бидний багш гэсэн агуулгын дор багтаажээ.

Бүлэг ЭГО гэдэг бол латинаар “Би” гэсэн үг хэмээн тайлбарласнаар эхлэнэ. Энэ бүлэг их этгээд, тэр хэрээрээ сонирхолтой, бүр хачирхалтай нь, үндэслэгээг нь уншаад үзэхэд зөвшөөрөхөөс өөр аргагүй болсон гээч. Сэтгэлдээ хөтлөгдвөл эсэргүүцэхийн дээдээр эсэргүүцмээр, оюун ухаандаа хөтлөгдвөл зөвшөөрөхөөс өөр аргагүйд хүрэв.

Энэ нь их эмзэг сэдэв. Либертари үзэлтнүүдийнхээр туслах ёстой хүмүүс ч байна, түүнээс гадна туслах ёсгүй хүмүүс ч бас байх аж:

• Либертари үзэлтнүүд хэзээ, хэнд туслах хийгээд эс туслахаа өөрсдөө мэднэ.
• Өөр шигээ хэнээс ч тусламж авах ёсгүй хэмээн боддог хүмүүст тусална.
• Тусалъя гэсэн хүмүүстээ л тусална.

• Ялхайж хэвтэж байснаа хэрэг болохоор тусламж авах гээд байдаг хүмүүст туслахгүй.

• “Надад тусалсангүй” гэсэн хүн бүрд туслахгүй.

• Бүхэл ертөнц өөрийнх нь төлөө байдаг хэмээн бодож явдаг хүмүүст туслахгүй.

• Орчин тойрныхоо бүх хүнийг “надад туслах ёстой” хэмээн бодож байдаг хүмүүст туслахгүй.

• Тусламжаар амьдрах нь гутамшигтай гэдгийг ойлгодоггүй хүмүүст бүр ч туслахгүй.
• Хэн нэгний тушааснаар, эсвэл хэн нэгнээс айж, бусдад муу хэлүүлэхээс эмээхдээ бусдад туслахгүй.

Номын дунд онцолж, томоор бичсэн нөгөөх эшлэлүүдээс ганц хоёрыг дурдвал:

либертари үзлийг эзэмшсэн жинхэнэ эгоист хүн бусдыг хэзээ ч өөрийнхөө төлөө золиосолдоггүй. ийм зүйлийг “нийт нь нэгийн төлөө, нэг нь нийтийн төлөө” хэмээн хашхирагсад л хийдэг.

манай монголчууд аман дээрээ “амиа бодох муухай” гэх авч амьдрал дээр хамгийн арчаагүйгээр амиа боддог. тэгвэл барууны соёлт орны иргэд амиа боддог, гэхдээ хэзээ ч бусдыг хохироодоггүй.

Батчулууны энэ бүтээлд хамгийн олон дурдагдсан, эш татсан сэтгэгч бол Айн Рэнд. Энэ бүлэгт мөн л эш татаж. Түүний Эх сурвалж шиг эгоизм, индивидуализмыг зоригтой, логиктой, философи үндэслэлтэй магтан дуулж, коллективизм, альтруизмын харгис, хуурмаг талыг нэвт шувт харуулсан бүтээл байхгүй аж. Мундаг роман. Энэ романыг уншчихвал эгоизм ямаршуухан рациональ үзэл болохыг ойлгоно гэжээ. Зөвхөн энэ роман биш, Сайтар эргэцүүл! жүжиг, Магтуу дис-утопи туужийн алиныг нь ч уншсан болно. Гурвууланг нь уншвал бүр ч сайн.

Энэ бүлгийн дүгнэлтийг их сэтгэгч Адам Смит Үндэстний баялаг зохиолдоо хэлчихсэн юм билээ: “Бидний өмнөх ширээн дээр буй элбэг дэлбэг хоол унд бол махны худалдаачин, шар айраг исгэгч, талхчины сайхан сэтгэлийн биш харин тэдний хувиа хичээсэн (онцлов. Зохиогч) үйлдлийн үр дүнд бий болдог.”