“Аqua Garden” буюу олны нэрлэж заншсанаар авлига хороололд 600 орчим айл өрх урьдчилсан захиалгаа өгчээ. Хэдийгээр "Aqua Garden"-д үл хөдлөх хөрөнгийн гэрчилгээ гарахгүй гэж холбогдох албанаас удаа дараа мэдэгдсэн ч урьдчилсан захиалгаа авч байгаа нь угтаа бол луйвар юм.

МАН-ын дарга нар камерын өмнө авлига хорооллыг нураана гэж амалдаг ч цаанаа ямар нэг үйлдэл гаргахгүй хүсэлгүй болох нь нэгэнтээ тодорхой болсон. Өөрөөр хэлбэл, өөрсдөө зөвшөөрөл өгч бариулсан барилгаа өөрсдөө нураана гэдэг шоу байсан гэсэн үг. Ингээд авлига хорооллыг нураах амлалтыг хэн, хэзээ өгч байсныг тоймлон хүргэе.

Монгол Улсын Ерөнхий сайд асан Л.Оюун-Эрдэнэ, хотын дарга асан Д.Сумъяабазар, нийслэлийн Засаг дарга Х.Нямбаатар нар авлига хороололтой ээлж дараалан биеэр очин танилцахдаа "удахгүй нураана" гэж улс төр хийчхээд явдаг. Тэдний тэрхүү үйлдэл бол үнэндээ олон нийтийг тархийг угаасан пропагандаа байсан нь одоо нэгэнтээ ойлгомжтой болжээ. Ингээд энэхүү хорооллын талаар хэн юу гэж мэдэгдэж байсныг тоймлон хүргэе.

Тэрбээр Ерөнхий сайд байхдаа буюу 2023 оны үерийн үеэр ийн амлалт өгч байсан. Түүнээс хойш хоёр жилийн хугацаанд тус хороолол баригдаж дууссан төдийгүй цахилгаан эрчим хүчинд холбогдсон. Мөн худалдан авалтаа хийсээр байгаа аж.

Экс Ерөнхий сайд Л.Оюун-Эрдэнийн өгсөн амлалтыг эргэн сануулахад, “Үер усны далан, суваг, шуудуу хааж газар олгосон, барилга барьсан Аqua Garden-д холбогдох зөвшөөрөл олгосон албан тушаалтнуудыг АТГ болон холбогдох хууль, хяналтын байгууллагад яаралтай өгч шалгуулах, шаардлагатай тохиолдолд барилгыг нураах, мөн ерөнхий төлөвлөгөөнд тусгагдаагүй газрыг аймаг, нийслэл, дүүрэг, орон нутгийн удирдлагууд олгодоггүй байх хууль санаачлах, БХБЯ-ны Газрын харилцаа, геодези, зураг зүйн газрыг түр хугацаанд Ерөнхий сайдын дэргэд ажиллуулахыг УОК, НОК-ын удирдлагуудад мэдэгдэж байна" гэж байлаа.

Тэгвэл нийслэлийн Засаг дарга асан Д.Сумъяабазар "Aqua Garden" хорооллын хоёр блокийг албадан нураах захирамж 2023 оны наймдугаар сард гаргаж байсан. Гэхдээ өөрөө уг барилгад газар олголтын зөвшөөрлийг өгсөн болох нь баримттайгаа дэлгэгдэж байлаа.

Нийслэлийн Засаг дарга Х.Нямбаатар шүүхийн шийдвэр гарвал уг барилгыг хэзээ л бол хэзээ нураахад бэлэн гэдгээ хэлсэн. Гэвч түүний үг гууль байсныг нийслэлчүүд өөрийн нүдээрээ харсан биз.

Энэ мэтчилэн хууль бусаар, хээл хахуулд автагдаж баригдсан барилга нийслэлийн хэмжээнд олон. Газар ашиглах зөвшөөрөлгүй, барилгын зөвшөөрөл олгогдоогүй байхад орон сууц барьсан, өөр зориулалтаар ашиглах талбайд орон сууц барьсан гэх мэт. Жишээ нь, Хан-Уул дүүргийн 26 хорооны барилгын  ажил юм. Тухайлбал, даац хэтэрсэн бүсэд хууль бусаар 16 давхар хоёр блок орон сууц барих барилгын ажил хийгдэж хэлсэн. Тухайн байршил нь орон сууцын нягтаршил өндөртэй, даац хэтэрсэн тул орон сууц барих ажил явуулах боломжгүйг хорооны даргаас эхлэн оршин суугч, НИТХ нар хэлж байгаа юм.

Харин авлига хорооллын хувьд "2008 онд анх газар олгох зөвшөөрөл авахдаа “Усан парк” барина гэж газрын болон барилгын зөвшөөрөл гаргуулсан ч сүүлдээ 24 давхар орон сууц болж хувирсан. Наана ард түмний тархийг угааж, цаанаа авлигатай эвлэрсэн авлигатай тэмцэгчдэд үнэндээ авлигатай тэмцэх хүсэл байсан уу гэдэг эргэлзээтэй.
Л.Оюун-Эрдэнэ, Х.Нямбаатар шиг эрх мэдэлтэй эрх баригчид энэ зэргийг барилгыг буулгаж чадахгүй байна гэдэг авлига, ашиг сонирхлын асуудал байна гэсэн үг юм.