Мэргэжлийн спортод багууд богино хугацаанд аварга авахын төлөө шилдэг тамирчдыг өндөр үнээр худалдан авч, супер бүрэлдэхүүн бүрдүүлдэг ч бүтэлгүйтсэн тохиолдлууд цөөнгүй. Цахим спортод ч ийм зүйл давтагдаж байх шиг. Саудын Арабын "Falcons" баг өнгөрсөн зуны амралтаар Оросын "Spirit" багийн академиас залуу тоглогч Максим Лукин буюу "kyousuke"-г багагүй үнээр худалдан авч, "NiKo", "m0NESY" нарын хамтаар тун дажгүй баг бүрдүүлсэн.

"Falcons" одоогийн бүрэлдэхүүндээ нийт 10 сая ам.доллар зарцуулсан гэнэ.

Харамсалтай нь өндөр хүлээлттэй байсан "Falcons"-ийн шинэ бүрэлдэхүүн эхний тэмцээн болох "IEM Cologne 2025"-г өндөрлүүлжээ. Тэд тэмцээнийг хоёрдугаар шатнаас эхлүүлсэн бөгөөд эхний тоглолтдоо "GamerLegion"-ийг хожсон ч удаах тоглолтдоо "The MongolZ" багт хожигдсон.

Улмаар хожигдох эрхгүй тоглолтыг "FURIA"-ийн эсрэг хийсэн ч 1-2 гэсэн харьцаатай ялагдаж, фэнүүдээ гонсойлгов.

Тоглолтын дараа тус багийн дасгалжуулагч, түрүүлж үзээгүй цом үгүй zonic ярихдаа "FURIA-г үл хүндлэх гээгүй юм шүү. Гэхдээ бид тэднийг хожих боломж бүрэн байлаа. Бага зэрэг урам хугарлаа. Гэхдээ багт үүрэг ролийн өөрчлөлт гарч, шинэ тамирчин ирлээ. Бид харилцах тал дээрээ асуудалтай байна. Өчигдөр MongolZ-ийн эсрэг багаасаа хангалттай эрч хүч мэдрээгүй" гэлээ.

2023 онд "Falcons"-ийн дасгалжуулагч болохдоо zonic "Хоёр жилийн дотор бид нар Мэйжорын аварга болно. Энэ бол миний зорилго" гэж байв. Тэгвэл тэрхүү хугацаа нь энэ жилээр дуусгавар болж байна. Оны сүүлийн Мэйжор ирэх арваннэгдүгээр сард Унгарын Будапешт хотноо эхэлнэ. Тэнд л дани дасгалжуулагч хэлсэн үгэндээ эзэн болох эсэхийг харцгаая.