Монгол Улсын Ерөнхий сайд асан, Улсын Их Хурлын гишүүн Л.Оюун-Эрдэнийн хүү иргэн О.Тэмүүлэнтэй холбоотойгоор цахим орчин, хэвлэл, мэдээллийн хэрэгсэлд гарсан болон иргэд, хуулийн этгээдээс ирүүлсэн гомдол, мэдээллүүдийг нэгтгэн Авлигын эсрэг хууль болон Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийг баримтлан Авлигатай тэмцэх газраас хянан шалгалаа. Нийтийн албан тушаалтан нь өөрийн болон гэр бүлийн гишүүдийн хөрөнгө, орлогын мэдүүлгийг хуульд заасан хугацаанд үнэн зөв мэдүүлэх, хөрөнгө, орлогын эх үүсвэрээ бодитой, үнэн зөв тайлбарлах үүргийг хуулиар хүлээдэг.

Хяналт шалгалтаар гомдол, мэдээлэлд дурдагдсан О.Тэмүүлэнгийн зарцуулсан хөрөнгийн эх үүсвэр хууль ёсны болох нь тогтоогдлоо.

“Херо энтертайнмент групп” ХХК-ийн гүйцэтгэх захирал Б.Баатар нь тус компанийн орлогоос О.Тэмүүлэнд 2025 оны нэгдүгээр сарын 12-ны өдөр 150 сая төгрөг, 2025 оны гуравдугаар сарын 16-ны өдөр 80 сая төгрөг, 2025 оны дөрөвдүгээр сарын 5-ны өдөр 70 сая төгрөг буюу нийт 300 сая төгрөгийг шилжүүлэн өгсөн болох нь холбогдох этгээдүүдийн тайлбар, санхүүгийн баримтуудаар нотлогдсон байна.

Нийслэлийн Татварын газраас ирүүлсэн баримтаар “Херо энтертайнмент групп” ХХК нь 2024 онд нийтдээ 265,8 сая төгрөгийн татвар төлсөн, 2024 оны жилийн эцсийн Аж ахуйн нэгжийн орлогын албан татварын тайлангаар 6,2 тэрбум төгрөгийн борлуулалтын орлого, татвар төлөхийн өмнөх ашиг 4,1 тэрбум төгрөг болохыг тус тус тайлагнасан нь баримтаар тогтоогдож байна.

“Хүлэг контент” ХХК, “Херо энтертайнмент групп” ХХК болон захирал Б.Б, иргэн А.А нарт холбогдох асуудалд тус газрын Мөрдөн шалгах хэлтсээс хэрэг бүртгэлтийн хэрэг нээн, мөрдөн шалгах ажиллагааг явуулж байна" гэх мэдээллийг өгсөн. 

Нэгдүгээрт, мөнгө угаах, терроризмыг санхүүжүүлэхтэй тэмцэх тухай хуулийн 3.1.5."улс төрд нөлөө бүхий этгээд" (УТНБЭ) гэж Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 20.2-т заасан этгээдийг хэлдэг. 

Нийтийн албанд нийтийн болон хувийн ашиг сонирхлыг зохицуулах, ашиг сонирхлын зөрчлөөс урьдчилан сэргийлэх тухай хуулийн 20.2-т Монгол Улсын Ерөнхий сайд, түүний эхнэр, нөхөр, хамтран амьдрагч, хүүхэд багтдаг.

Хуулиараа хүү нь улс төрд нөлөө бүхий этгээдийн хувьд орлого нь хууль ёсны гэдгээ нотлох үүрэг хүлээдэг. Мөн ФАТФ-ын зөвлөмж 12 ба 22-д зааснаар УТНБЭ-ийн хамаарал бүхий этгээд тул хөрөнгөө мэдүүлэх этгээд биш ч хянаж шалгах зайлшгүй шаардлагатай этгээд байна. Хяналтыг НҮБ-ын Авлигын эсрэг конвенцийн 52-р бүлэгт зааснаар мөрдөж, шалгана. Бид конвенцийн гишүүн улс тул заавал дагаж мөрдөнө.

Түүнчлэн, АТГ энгийн иргэн байсан ч сэжигтэй гэж үзсэн бүх тохиолдлыг шалгах үүрэгтэй, орлогыг нотлуулах үндэслэлтэй. 

Энэ тохиолдолд хүү О.Тэмүүлэн нь нэг тэрбум төгрөгийн машин, бөгж, цүнх зэргийн мөнгийг төлөхдөө хувиараа орлого олсон гэжээ. Тэгвэл орлогын эх үүсвэрийг шалгана.

Ингэхдээ "Херо" энтертэйнмент ХХК-иас орлого олсон гэсэн мэдээлэл байгаа бол хоёр зүйлийг шалгах ёстой. Нэгдүгээрт, тухайн компаниас орлого авсныг нотолно. Энэ нь дансны гүйлгээ, НДШ төлөлт (хувь хүн + компани аль аль нь ногдох хувь хэмжээгээр төлсөн баримт) болон ХАОАТ (хувь хүн) төлөлтөөр нотлогдох үндэслэлтэй. НДШ төлөлт нөхөгдөж төлөгддөггүй, хүний тоогоор баталгаажсан тул нотлох амархан.

Хоёрдугаарт, тухайн компанийн орлого хууль ёсных эсэхийг нотлох ёстой.

Тэгэхээр дээрх бүх нотолгоог шалгасан, тогтоосон эсэхийг баримтаар, нэг бүрчлэн шаардах хэрэгтэй. Түүнчлэн, УТНБЭ-ийн болзошгүй авлигатай холбоотой хэргийг шалгахдаа “мөрдөн шалгалтын нууц”-д хамааруулах үндэслэлгүйг анхаарна уу. Учир нь НДШ, ХАОАТ төлөлтийн мэдээлэл ил биш ч, бусад мэдээлэл нь Шилэн дансны тухай хуулийн 6.4.4, Нийтийн мэдээллийн ил тод байдлын тухай хуулийн 8.1 эдгээрийг дагаж батлагдсан журмуудад зааснаар ил тод байх ёстой.  

Дээрээс нь Авлигатай тэмцэх газраас тус хэрэгтэй холбоотой нэр бүхий иргэнээс ирсэн гомдолд дараах хариуг өгсөн байгаа юм. Үүнд, иргэн О.Тэмүүлэнд Херо энтертайнмент групп ХХК, Хүлэг контент ХХК-иудаас нийгмийн даатгалын шимтгэл, хүн амын орлогын албан татвар төлөгдөөгүй. Хувьцаа эзэмшигчийн хамаарал бүхий этгээдийн хувьд ажил, гүйцэтгэлд нь тусалж урамшуулал авч байсан зэрэг нөхцөл байдал тогтоогдсон гэсэн байгаа юм. Тэгэхээр татвар төлөөгүйгээрээ хувь хүн, хуулийн этгээд хоёулаа хариуцлага хүлээх ёстой. Татвар төлөөгүй бол гүйлгээ хийснийг батлахгүй" гэх байр суурийг илэрхийлэв.