АНУ-ын ерөнхийлөгчөөр сонгогдвол Орос-Украины дайныг нэг өдрийн дотор зогсоож чадна гэж амлалт өгч байсан Дональд Трамп Даваа гаригт (2025.07.28) Оросын ерөнхийлөгч Владимир Путинд хандаж мэдэгдэл хийжээ. Тэрбээр Оросыг Украинд хийж буй дайнаа зогсооход 10-12 хоногийн хугацаа өгч буйгаа мэдэгдсэн байна. Өмнө нь Трамп 50 хоногийн хугацаа өгсөн байсан ч наашлуулах болсон байна. Хэрэв эл хугацаанд дайныг зогсоохгүй бол Орос улсад маш ноцтой тариф ногдуулна гэж анхааруулжээ.

Трамп энэ долоо хоногт Шотландад айлчилж буй. Тэрбээр Их Британийн ерөнхий сайд Кейр Стармертай хийсэн уулзалтынхаа үеэр "Ерөнхийлөгч Путинд маш их урам хугарсан. Тийм учраас бид нөхцөл байдлыг эргэн харах хэрэгтэй. Түүнд өгсөн 50 хоногийн хугацааг богиносгохоор шийдлээ. Бид тохиролцоонд хүрлээ гэж бодож байсан. Гэтэл ерөнхийлөгч Путин гэнэт Киев болон бусад хот руу пуужин харваж, олон хүний аминд хүрсээр байна. Гудамжинд энд тэндгүй хүмүүсийн цогцсууд хэвтэж байна” гэж онцлон тэмдэглэсэн байна.

Түүнчлэн тэрбээр Ойрхи Дорнод дахь асуудлын талаар ярилцсан байна. Тодруулбал, Трамп АНУ-ын Газын зурваст чиглэсэн бодлогод томоохон өөрчлөлт оруулах бодолтой байгаагаа илэрхийлсэн байна. Тэрбээр хэлэхдээ, Израиль болж буй үйл явдалд маш их хариуцлага хүлээдэг. Гэхдээ 2023 онд Хамас Израиль руу дайрснаасаа хойш барьцаанд байгаа израильчуудыг одоо хүртэл суллахгүй байгаа нь асуудлыг хүндрүүлж байна гэжээ. Трамп мөн "Израиль маш их зүйлийг хийж чадна гэж би бодож байна " гэж мэдэгдээд, дараагийн удаа тус улсын ерөнхий сайд Беньямин Нетаньяхутай уулзахдаа Газад хүнсний тусламж сайтар үзүүлэхийг уриална гэсэн байна.