Универсиад - Энэ бол өрсөлдөөн бус нөхөрлөл, эв нэгдэл, аялал

News.mn сайт Герман улсын Рейн-Рур хотын бүс нутагт болж буй 32 дахь удаагийн дэлхийн универсиад наадмыг албан ёсны эрхтэйгээр сурвалжилж байна.

Герман улсын Рейн-Рур бүс нутгийн таван хот болон нийслэл Берлин хотноо зуны 32 дахь удаагийн дэлхийн универсиад наадам болж, өчигдөр/2025.07.27/ өндөрлөлөө. Нийт 12 өдрийн турш дэлхийн өнцөг булан бүрээс шилдэг оюутан-тамирчид чуулж, дан ганц өрсөлдөх бус нөхөрлөж, эвлэлдэн нэгдэж, амьдралынхаа нэгэн гайхалтай аяллыг туулав.

Нийт 234 багц медалийн төлөө 113 улсын 7000 гаруй тамирчид өрсөлдсөн бөгөөд Япон улс 34 алт, нийт 79 медальтай багийн дүнгээр тэргүүлжээ. Харин зохион байгуулагч Герман улс 40 медаль хүртсэний дотор 11 алтан медаль багтаж, тус наадмын түүхэн дэх хамгийн өндөр амжилтуудынхаа нэгийг үзүүлсэн аж.

Мөн нийт универсиад наадмын 28 рекорд шинэчлэгдсэн гэнэ. Усан сэлэлтээр л гэхэд 17 рекорд шинэчлэгдсэн гэхээр гайхалтай.

"Рейн-Рур 2025" зуны универсиадын 18 спортыг нийт 1.2 сая хүн үзэж сонирхжээ. Монгол Улс энэ удаагийн универсиадаас нэг хүрэл медаль хүртсэн нь жүдогийн төрөлд Т.Түмэнжаргал байсан.

Наадмын хаалтын өмнөх хэвлэлийн бага хуралд оролцсон Сайн дурын ажил, спортын төрийн сайд, доктор Кристиане Шендерлейн ярихдаа "Энэ удаагийн универсиад спортод ямар их хүч байдгийг харууллаа. Тамирчдын гайхалтай амжилтыг би үнэхээр биширлээ. Германы тамирчдадаа баяр хүргэе. Та нар эх орноо тун сайн төлөөллөө. Энэ удаагийн универсиад энэ наадмын түүхэнд, үзэгчдийн сэтгэл зүрхэнд өөрийн өвийг үлдээсэн гэдэгт итгэлтэй байна. Герман улс ямар гайхалтай, мэргэжлийн, сайхан зохион байгуулагч вэ гэдгээ харууллаа. Бид энэ наадмын ачаар улам цааш зорихоор боллоо. Герман улс олимп, паралимпийн наадмыг зохион байгуулах боломжтой гэдгээ харууллаа. Хамтдаа бид үүрд дуурсагдах зүйлийг бүтээлээ" гэжээ.

"Рейн-Рур 2025" универсиадыг тоон үзүүлэлтийг илэрхийлвэл