АНУ-ын ерөнхийлөгч Дональд Трампын хэрэгжүүлж буй холбооны зардлыг танах хөтөлбөрийн улмаас "NASA" сансрын агентлагийн 4000 орчим ажилтан ажлаас гарах өргөдөл гаргасан гэж тус улсын хэвлэлд мэдээлж байна. "CBS News" болон бусад хэвлэл мэдээллийн хэрэгслээр нийт 3870 ажилтан буюу "NASA"-гийн нийт ажилчдын 20 гаруй хувь нь ажлаасаа гарах өргөдөл гаргасан гэж мэдээлжээ. Тус сансрын агентлагт нийт 18 мянга орчим хүн ажилладаг аж.

Тус улсын хэвлэлийн мэдээлэлд, огцрох хөтөлбөрт хамрагдах өргөдлийг хүлээн авах эцсийн хугацаа нь Баасан гаригт (2025.07.25) дууссан байна. Тухайн ажилчдыг ажлаас нь чөлөөлсний үр дүнд аравдугаар сард эхлэх санхүүгийн жилийн төсвийг өмнөх оны мөн үеэс 24 хувиар бууруулна гэж Трампын засаг захиргаа мэдэгджээ.

Өнгөрсөн долоо хоногийн Даваа гаригт (2025.07.21) "NASA"-гийн 360 орчим ажилтан зарлага танах гэж ажилчдыг цомхотгож буйг эсэргүүцсэн захидал илгээсэн байна. "Voyager Declaration" гэх олон нийтэд нээлттэй тус захидалд "Сүүлийн зургаан сарын хугацаанд хурдан бөгөөд үрэлгэн өөрчлөлт гаргаж байсан нь бидний зорилгыг алдагдуулж, NASA-гийн ажиллах хүчинд гамшигтайгаар нөлөөлсөн" гэж онцлон тэмдэглэсэн байв.