Анхдугаар богд Занабазарын мэлмий гийсний 390 жилийн ой, Өндөр гэгээний даншиг наадам өнгөрсөн амралтын өдрүүдэд буюу энэ сарын 26-27-нд өргөн дэлгэр болж өндөрлөв. Тус наадмын бөхийн барилдаанд  Улсын аварга О.Хангай, Улсын арслан Ц.Содномдорж, Э.Оюунболд, Б.Орхонбаяр, Ц.Бямба-Отгон, Э.Батмагнай нарын зургаан арслан 11 заан, 14 харцага, 30 начин нийт 62 улсын цолтноос бүрдсэн 512 хүчтэн уран мэхийг уралдуулж, эр бяраа сорилоо. Улсын баяр наадмаас дутуугүй бай шагналтай, бөхийн хорхойтнуудын анхаарлыг татсан, авшиг шингэсэн наадамд хэн түрүүлэх вэ гэсэн таамаглалыг эвдсэн уран гоё барилдаан болсон билээ.

Улсын баяр наадмын үзүүр, түрүүний бөхийн таамгийг эвдэж, шинэ арслан цол хүртсэн Э.Батмагнайн од гүйсэн жил болж байна гэхэд бодит үнэнээс  хол зөрөхгүй. Улсын наадамд зодоглосон 512 бөхийн барилдаан түрүүлсэн тэрбээр Өндөр гэгээний мэлмий гийсний ойд зодоглож, уран мэхтэй, үнэнхүү хүчтэй арслан цолоо бататгаж, ирээдүйн аварга цолтны таамаглалд нэр нь хэдийнэ багтжээ.

Өндөр гэгээний наадмын бөхийн барилдааны үзүүр түрүүнд залуу арслангууд бяр хүч, мэх юугаан үзсэнээс Баянхонгор аймгийн Жинст сумын харъяат шинэхэн арслан Э.Батмагнай түрүүлж, Сэлэнгэ аймгийн Цагааннуур сумын харьяат Улсын арслан Б.Орхонбаяр үзүүрлэв. Э.Батмагнайгийн хувьд энэ жилийн ес давж түрүүлсэн хоёр дахь бөхийн барилдаан нь юм.

Тэрбээр өнгөрсөн жил Ерөнхийлөгчийн цомын төлөө барилдаанд түрүүлж цомын эзэн болсон. Мөн заалны барилдаануудад үргэлж дээгүүр барилдсан гээд түүний хувьд од нь гийсэн жил болж байна. Өөрийн үнэн хүчээр барилдсан гээд бөхөө дээдэлдэг Монголчуудынхаа хайр хүндэтгэлийг хүлээсээр.

Өдгөө 24 настай тэрбээр Улсын наадам түрүүлж, 76 жилийн дараа Баянхонгор аймагт арслан цол авчирсан түүнийг "MCS" компани нэг тэрбум төгрөгөөр шагнасан юм.  Тэгвэл Өндөр гэгээний ойд зориулсан барилдааны түрүү бөхийг Ланд Круизер-300 авто машинаар байлж,  үзүүрлэсэн бөх 70 сая төгрөг, их шөвөгт үлдсэн хоёр бөхөд тус бүр 35 сая төгрөгийн бай шагнал хүртээлээ.

Ингээд шинэ арсландаа ирээдүйд даяар дуурсах дархан аварга болохыг ерөөе.