Өвөрхангай аймгийн Арвайхээр болон Өндөр Гэгээний мэндэлсэн Есөнзүйл суманд өнөөдөр /2025.07.27/Анхдугаар Богд Занабазарын мэндэлсний 390 жилийн ойд зориулсан Даншиг наадам гурав дахь өдрөө үргэлжилж байна. Тус наадам нь энэ сарын 25-нд эхэлсэн ба шашин, түүх, соёлыг хослуулсан чухал арга хэмжээ болж байгаа юм. Наадмын хүрээнд:

• Бурхан шашны ном хурах ёслол;
• Цамын бүжиг;
• “Гэгээрэл ганданд очихуй” нэртэй соёлын парад;
• Монгол бичиг, уран зураг, барималын үзэсгэлэн;
• Үндэсний бөх, сур, шагайн харваа;
• Ардын урлаг, язгуур соёлын тоглолтууд зэрэг олон арга хэмжээг зохион байгуулсан.

Арвайхээрийн төв талбайд мянга мянган иргэд цугларч, маани мэгзэм уншиж, лам нар ном хурах зэрэг шашны зан үйлийг үйлдсэн юм. Харин Есөнзүйл суманд Занабазарын хөшөө, төрсөн бууринд мөргөл, номын айлдваруудыг хийжээ.

Тус наадамд Энэтхэг, Түвд, ОХУ, БНСУ зэрэг орны шашны болон соёлын төлөөлөгчид оролцсон ба ЮНЕСКО-гийн төлөөлөгч нар ч хүрэлцэн ирсэн аж. Учир нь Занабазарын зарим бүтээлийг дэлхийн соёлын өвд бүртгүүлэх саналыг Монгол Улс дэвшүүлээд буй.

Өндөр Гэгээн Занабазар нь XVII зууны Монголын шашин, соёл, урлагийн хөгжилд чухал хувь нэмэр оруулсан нэрт гэгээнтэн юм. Монголын анхны мэргэжлийн зураач, барималч, “Соёмбо” үсгийг зохиосон нэгэн гэдгээрээ түүхэнд нэрээ үлдээсэн билээ.

М.НАМУУН