Филиппин Улсын Манила хотод Олон улсын биологийн 36 дахь удаагийн олимпиад энэ сарын 20-24-ны хооронд болж, шилдгүүдээ тодрууллаа. Уг олимпиадад дэлхийн 75 орны 300 гаруй сурагч оролцсон байна.

Монгол Улсаа төлөөлөн оролцсон Орчлон сургуулийн 12 дугаар ангийн сурагч А.Амартүвшин хүрэл медаль хүртсэн бол Монгол тэмүүлэл сургуулийн 11 дүгээр ангийн сурагч С. Сансармаа тусгай байрт шалгарчээ. Бусад сурагчдын хувьд өндөр онооны гүйцэтгэлтэй оролцсон байна. Энэ удаагийн олимпиад тус бүр гурван цаг үргэлжилж онолын хоёр шалгалт, 90 минутын дөрвөн дадлагын ажилтай байсан аж.

36 дахь олимпиадын хүрээнд болж буй арга хэмжээнүүд өнөөдөр (2025.07.26) дуусах төлөвлөгөөтэй байсан. Гэхдээ зохион байгуулагчдын зүгээс нэг өдрийн өмнө олимпиадын дүнг зарлаж, шагналыг гардуулсан аж. Түүнчлэн энэ удаагийн олимпиадад Пакистан, Бангладешийн баг хамт олон амжилт гаргаж, алт, хүрэл медалийг тус тус авчээ.