ОХУ-ын Алс Дорнодод осолдож, онгоцонд явсан 48 хүн бүгд амиа алдсан Антонов Ан-24 зорчигч тээврийн онгоцны хар хайрцгийг яаралтай тусламжийг баг олсон байна. Ослын мөрдөн байцаалтын хүрээнд хар хайрцгийг Москвад шинжлүүлэхээр илгээнэ гэж засгийн газрын албан ёсны "Telegram" хуудаст нийтлэгджээ.

Тус агаарын тээврийн онгоц Пүрэв гаригт (2025.07.24) 13:00 цагийн орчимд газрын диспетчерүүдтэй холбоо тасарсан юм. Ан-24 онгоц Амур мужид байрлах Тында хотын нисэх онгоцны буудлаас хэдэн километрийн зайд нисч байхдаа осолдсон. Диспетчерийн мэдээлснээр, уг онгоц Хабаровскоос хөөрч, Благовещенскт саатаад Тында руу явж байжээ. Мөн онгоц радараас алга болохоосоо өмнө ослын дохио өгөөгүй, техникийн асуудал мэдээлээгүй гэж Онцгой байдлын албаныхан мэдэгдэв. Дараа нь аврах багийнхан 30 мянга хүрэхгүй хүн амтай Тынде хотоос 16 км-ийн зайд шатсан онгоцны сэгийг олсон юм.

Амур мужийн Тээврийн сайд Андрей Никитин амиа алдсан хохирогчдын ар гэрт тус бүр таван сая рубль буюу 63 мянган ам.долларын нөхөн олговор олгоно гэж мэдэгдсэн байна. Улмаар эрх баригчид төлбөрийг түргэн шуурхай хүргэхээр ажиллаж байна гэж орон нутгийн хэвлэлд мэдээлжээ.