Борооны улмаас учирсан хохирлын хэмжээг тогтоохоор ажиллаж байна

Нийслэлийн Онцгой байдлын газраас, өчигдөр буюу 2025 оны долдугаар сарын 24-ны орой болсон хүчтэй нөөлөг салхи болон аадар борооны нөхцөл байдлын талаар мэдээлэл өгөв.

Тодруулбал, 2025 оны долдугаар сарын 24-ний 20:00 цагаас эхлэн долдугаар сарын 25-ны 08:00 цаг хүртэл нийт нутгаар бороо орсон байна. Төв болон зүүн аймгуудын нутгаар 0.2-65.0 мм дуу цахилгаантай аадар бороо орсон аж.

Үүнээс хамгийн их нь Сүхбаатар аймгийн Халзан суманд 65.0 мм бороо орсон бол Дорнод аймгийн Хэрлэн суманд 37.0 мм бороо оржээ.

Төв аймгийн Лүн, Нийслэл Баянзүрх дүүрэгт 21.0 мм, Булганы Тэшигт 20.0 мм, Хэнтий аймгийн Дадал суманд 19.0 мм, Төв аймгийн Мөнгөнморьт, Дорнодын Чулуунхороотод 18.0 мм, бусад нутгаар 0.0-17.0 мм бороо орсон байна. Салхины хурд түр зуурын нөөлөг салхины үед 26м/с хүрч салхилжээ.

Өнгөрсөн хоногт ихэнх нутгаар 5-10 м/с, бороо орсон газруудаар борооны өмнө түр зуур 24-33 м/с хүрч ширүүсэж, салхилсаны улмаас Сүхбаатар аймгийн Халзан, Уулбаян, Төв аймгийн Аргалант, Баянхангай, Лүн, Эрдэнэсант сум, нийслэлийн Сонгинохайрхан, Сүхбаатар, Хан-уул дүүрэгт нийт 116 айлын гэр нурж, хашаа, байшингийн дээвэр хууларсан зэрэг дуудлага, мэдээлэл бүртгэгдсэн байна.

Тодруулбал, Сүхбаатар аймгийн Халзан суманд 27 айлын гэр, 20 хашаа, гурван байшингийн дээвэр, цэцэрлэгийн тоглоомнууд болон хүлэмж нурж, үерийн далан сэтэрч, таван айл усанд автаж 15 автомашин шаварт суусан байсныг дуудлагаар сумын мэргэжлийн ангийнхан ажиллаж, аюулгүй болгосон байна. Мөн Уулбаян суманд 11 гэр, 1 зөөврийн сууц, Түмэнцогт суманд зөөврийн сууц нурж, 2 автомашины салхины шил хагарсан бөгөөд хохирлын хэмжээг тогтоохоор ажиллаж байна.