Туркийн Истанбул хотод Украин, Оросын төлөөлөгчид Лхагва гаригт (2025.07.23) цуглаж, энхийн хэлэлцээний гурав дахь шатны уулзалтаа хийлээ. Эл үеэр Украины төлөөлөгчид хоёр орны ерөнхийлөгч нарын уулзалтыг зохион байгуулах санал гаргасан ч Оросын тал татгалзсан байна. Украины талаас батлан хамгаалахын сайд асан, одоо үндэсний аюулгүй байдал, батлан хамгаалах зөвлөлийн нарийн бичгийн даргаар ажиллаж байгаа Рустем Умеров тэргүүтэй төлөөлөгчид хэлэлцээнд оролцжээ.

Умеров хоёр орны ерөнхийлөгч нарын уулзалтыг наймдугаар сарын сүүлчээр зохион байгуулахыг санал болгосон бөгөөд ингэснээр үндсэн асуудал шийдэгдэх боломжтой гэж үзэж буйгаа илэрхийлсэн байна.

Тэрбээр мөн АНУ, Туркийн ерөнхийлөгч нарыг нэгдэхийг хүссэн байна. Умеров хэлэхдээ, "Энэ саналыг хүлээн зөвшөөрснөөр Орос улс дэлхийн өнцөг булан бүрт, тэр дундаа манай түншүүдэд ямар хандлагатай байгаагаа тодорхой харуулж чадна. Украин үр дүнтэй дипломат харилцааны зайлшгүй үндэс болох бүрэн бөгөөд болзолгүйгээр гал зогсоохыг шаардаж байна" гэжээ.

Путины туслах Владимир Мединский Оросын багийг тэргүүлжээ. Тэрбээр сэтгүүлчдэд хэлэхдээ, энэ удаагийн уулзалтаар дор хаяж 1200 олзлогдсон цэргийг солилцох тохиролцоонд хүрсэн байна. Гэвч Мединский хоёр орны удирдагчдын уулзах төлөвлөгөөг хойшлуулж, "Уулзалт болохын тулд бид эхлээд хэлэлцээний нөхцөлийг боловсруулж, яг юуны талаар хэлэлцэхийг тодорхойлох хэрэгтэй" гэсэн байна.

Трампын засаг захиргаа оросуудад шахалт үзүүлсэн хэвээр байна. Трамп саяхан хийсэн мэдэгдэлдээ, хоёр сар хүрэхгүй хугацаанд тохиролцоонд хүрч чадахгүй бол хатуу тарифтай тулгарах болно гэж онцолсон юм. Гэсэн хэдий ч талууд санал зөөлдсөн хэвээр байгаа бөгөөд аливаа энхийн хэлэлцээг байгуулах нөхцөлийн талаар үргэлжлүүлэн хэлэлцээ хийнэ гэх байр суурьтай байна.