“Ёохор хатар-2025” наадмыг долдугаар сарын 30-31-ний өдрүүдэд Хэнтий аймгийн Батширээт суманд зохион байгуулна. Энэ жилийн “Ёохор хатар-2025” наадамд 150 сая төгрөг төсөвлөсөн бөгөөд наадмын үеэр ёохор бүжиг, хатар жороо, морины уралдаан, буриад сур харваа, буриад бөхийн барилдаан, сээр шалгах тэмцээн зохион байгуулна. Тэмцээн тус бүрт эхний гурван байр эзэлсэн оролцогчдод өргөмжлөл, мөнгөн шагнал гардуулна.

Үүнээс гадна наадамд Монгол Улс, ОХУ-ын Буриад Улс, Өвөр байгалийн хязгаар, Эрхүү муж болон ӨМӨЗО-ны Хөлөн буйр аймаг, Шинэхэн хошуу болон бусад газраас ирж оролцох аж. Өнгөрөгч 2023 оны “Ёохор хатар”  наадамд гадаадын болон дотоодын 2400 гаруй жуулчид ирж үзсэн байна.

Засгийн газраас 2023-2028 оныг Монголд зочлох жил болгон зарласан. Үүнтэй холбогдуулан “Go Mongolia”  хөтөлбөрийн хүрээнд үндэсний брэнд болон түүхэн аялал жуулчлалыг бүс нутагт сурталчлах зорилготой тус наадмыг зургаа дахь жилдээ зохион байгуулах гэж байна.

Монгол улсын Засгийн газрын хэрэгжүүлэгч агентлаг, Хүүхэд, гэр бүлийн хөгжил, хамгааллын ерөнхий газар, Биеийн тамир, спортын улсын хороо, Соёл, урлаг, аялал жуулчлал, залуучуудын газрын тус наадмыг хамтран зохион байгуулж байна.

А.ТАМИР