Европын холбоо, Япон зэрэг 25 орон хамтарч мэдэгдэл гарган, Газын зурваст нэн даруй гал зогсоохыг уриаллаа. Хамтарсан мэдэгдэлд, Газын зурвас дахь палестинчуудад зориулсан тусламжийн цувааг хориглолгүй, НҮБ болон хүмүүнлэгийн төрийн бус бусад байгууллагын амь нас аврах ажиллагааг үргэлжлүүлэн гүйцэтгэх боломжоор хангахыг Израилаас хүссэн байна. Мөн "Бид энэхүү аймшигт мөргөлдөөнийг эцэс болгохын тулд олон улсын хамтын нийгэмлэгийг нэгдэхийг уриалж байна. Цус урсгах нь ямар ч зорилго, үр дүнд хүргэхгүй" гэж онцлон тэмдэглэсэн байжээ.  Израилын Батлан хамгаалах яам Газын зурвас дахь цохилтоо үргэлжлүүлсэн хэвээр байна. 2023 оны аравдугаар сард мөргөлдөөн эхэлснээс хойш анх удаа Израилын хуурай замын цэргийн хүчин Газын төв хэсэгт нэвтэрч, Дейр аль-Балах хотод цохилт хийж эхэлсэн талаар орон нутгийн хэвлэлд мэдээлжээ. Энэ оны тавдугаар сард Израилын цохилтыг үл харгалзан Палестинд хүнсний тусламж хүргэх шийдвэрийг АНУ тэргүүтэй сан гаргасан юм. Гэсэн хэдий ч Израилын хүчин хүнс түгээх газруудын ойролцоо гал нээж, энгийн иргэд амиа алдсаар байна. Орон нутгийн хэвлэлд мэдээлснээр, хамгийн сүүлийн үеийн Израилын цохилтод 1021 хүн амиа алдсан байна.

Хамасын зүгээс 25 орны хамтарсан мэдэгдлийг сайшааж, дэмжиж буйгаа илэрхийлсэн байна. Харин Израилын Гадаад хэргийн яам тухайн мэдэгдлийг няцаасан бөгөөд дайныг эхлүүл, мөргөлдөөнийг уртасгаж буй Хамаст шаардлага тавих ёстой гэж мэдэгджээ.