Монголын толгой баячуудад тооцогдох "Эрэл"-ийн Б.Эрдэнэбат,  УИХ-ын гишүүн асан "Жем интернэшнл" группийн эзэн, улсын гарьд Ц.Цэрэнпунцаг нарын хүүхдүүд архи согтууруулах ундаа хэрэглэсэн үедээ бусдын биед бүлэглэн халдаж хүнд гэмтэл учруулсан хэрэг өндрийг авч олон нийтийн анхаарлын төвд байна.Үүн дээр нэмээд ЦЕГ-ын дарга асан Ж.Болдын хүү болон Таванбогд группийн захирал Ц.Баатарсайханы хүү байсан гэх албан бус яриа гараад байгаа юм. Мөн эдгээр залуус зодоон хийх үедээ мансууруулах бодис хэрэглэсэн байсан гэх яриа олон нийтийн сүлжээгээр явж буй. Мөн "Таван богд" группийн захирал Ц.Баатарсайханы хүү Б.Амарсайханыг энэ сарын 20-нд хил давсан энэ сарын 27-нд ирнэ гэх мэдээлэл ч цацагдаад байгаа юм.

Тэгвэл ЦЕГ-аас энэ талаар тодруулахад, "Хэргийг харьяа дүүргийн хэлтэст шалгаж байгаа мөрдөн шалгах ажиллагаа үргэлжилж байгаа учир тодорхой мэдээлэл өгөх боломжгүй. Мөн мансууруулах сэтгэцэд нөлөөт бодис хэрэглэсэн эсэхэд сорил тавьж үзсэн одоогийн байдлаар шалгалтын ажиллагаа үргэлжилж байна" гэсэн юм.

Мансууруулах бодис хэрэглэсэн нь хэдий хугацаанд хариу нь гардгийг тодруулахад," Мансууруулах бодис хэрэглэсэн эсэхийг хоёр үе шаттай тогтоож болдог. Сорилын хариуг холбогдогч этгээдэд танилцуулж улмаар хариуг хүлээн зөвшөөрөхгүй бол дахин сорил авдаг" гэхээс өөр мэдээлэл өгсөнгүй.

Мөн хэрэгт нэр холбогдсон "Таван богд" группийн захирал Ц.Баатарсайханы хүү Б.Амарсайханг хил давсан эсэхийг тодруулахад, "мөрдөн шалгах ажиллагаа үргэлжилж байгаа учир үүнийг хэлэх боломжгүй" гэлээ.

ЦЕГ-аас мэдээлэл хийх үеэрээ гэмтсэн иргэний хувьд биеийн байдал сайнгүй, эмнэлэгт эмчилгээ хийлгэж байгаа гэдгийг хэлсэн. Тэгвэл Гэмтэл согог судлалын үндэсний төвөөс хохирогчийн биеийн байдлыг асуухад, "Хувь хүний эрүүл мэндтэй холбоотой асуудал учир мэдээлэл өгөх боломжгүй. Ар гэрээс асуугаарай" гэв.

Энэ мэт олон нийтийн сүлжээгээр албан бус мэдээллүүд хөвөрч иргэдийн дунд өндөр албан тушаалтан, бэлтэй  айлын хүүхдүүдийн гэмт хэрэг дарагдаад өнгөрөх вий гэсэн хардлага үүсээд байгаа юм. Харин иргэдэд үнэн зөв мэдээлэл өгч төөрөгдлийг арилгах ёстой субъект болох Цагдаагийн байгууллага чимээгүй байгаа нь энэ хэрэг хэрэгсэхгүй болж дарагдаад өнгөрөх магадлалтай байна гэж иргэд хардаж байгаа. Хэрэв энэ хэрэг үнэн зөвөөр шийдэгдэхгүй бол иргэдийн шүүх, цагдаад итгэх итгэл үгүй болох юм. Угтаа иргэд цагдаа, шүүхийн байгууллагын зарим албан тушаалтнууд мөнгөтэй, өндөр албан тушаалтай хүнд үйлчилдэггүй жирийн иргэдийг алхам тутамд нь торгодог, хорьдог гэх зүйлийг хэлдэг.

Мөнгөтэй, эрх мэдэлтэй бизнесменүүдийн хүүхдүүд бусдын биед халдаж, хүндээр гэмтээсэн хэрэг нийгэмд дуулиан тарьж байна. Угтаа хууль хүн бүрт тэгш үйлчлэх ёстой!

Э.Тэмүүлэн, Ц.Санжаачойпэл нарыг Эрүүгийн хэрэг хянан шийдвэрлэх тухай хуулийн 31.4 дүгээр зүйлийн 1 дэх хэсгийн 1.4 дэх заалтад заасан “гэмт хэрэг үйлдсэн гэх хангалттай үндэслэл байгаа, түүнчлэн дахин гэмт хэрэг үйлдэх, гэмт хэргээ төгсгөх үндэслэл байгаа бол” гэх үндэслэлээр 48 цагийн хугацаатай баривчлаад байгаа юм. Тэдний цагдан хорих хугацаа өнөөдөр /2025.07.22/ 22:00 цагт дуусна. Үргэлжлүүлэн хорих эсэх нь тодорхойгүй байна.