Өмнөд Солонгост орсон хүчтэй аадар борооны улмаас үер бууж, нуранги үүсч, 17 хүн нас барсан гэж тус улсын Гамшгаас хамгаалах алба мэдэгдэв. Мөн 11 хүн сураггүй алга болсон тул эрэн хайх, аврах ажиллагаа үргэлжилж байна. Гапёнг хот болон Чунчон мужид өнгөрсөн амралтын өдрүүдэд хөрсний гулгалт үүссэн бөгөөд зам, гүүр эвдэрснийг харуулсан зураг, оршин суугчдыг болгоомжтойгоор хорогдох байранд хүргэж буй видео бичлэг цахим орчинд цацагдсан юм. Хэдийгээр аврах багийн алба хаагчид үерт автсан мужуудад зогсолтгүй ажиллаж байгаа ч нас барагсдын тоо нэмэгдэж магадгүй гэдэгт эрх баригчид санаа зовж буйгаа илэрхийлжээ.

Аадар борооны улмаас хамгийн их хохирол амссан нь өмнөд хэсгийн Санчон хот аж. Эрх баригчдын мэдээлснээр, тус хотод зургаан хүн үерийн улмаас амиа алдаж, долоон хүн сураггүй алга болсон байна. Мөн үер, хөрсний нурангиас болж олон мянган зам, барилга эвдэрч, живж, тариалангийн талбай сүйдэж, мал сүрэг олноор үхэж байна гэсэн мэдээлэл гарсан юм. Бүс нутгийн хэмжээнд өнгөрсөн долоо хоногийн Лхагва гаригт (2025.07.16) орсон аадар борооноос хойш 10 мянга гаруй хүн гэр орноо нүүлгэн шилжүүлж, 41 мянга гаруй өрх түр хугацаанд тог цахилгаангүй болсон гэж орон нутгийн хэвлэлд мэдээлсэн байна. Хамгийн их хохирол амссан өмнөд болон төвийн нутгаар бороо үндсэндээ намжсан. Гэсэн хэдий ч Ням гаригийн шөнө аадар бороо хойд зүг рүү шилжиж, Сөүл болон хойд бүс нутагт хур тунадас орсон хэвээр байх төлөвтэй байгааг Өмнөд Солонгосын Цаг уурын албанаас мэдэгджээ.