Өнгөрсөн оны арванхоёрдугаар сард зорчигч тээврийн онгоцыг санамсаргүйгээр унагаж, онгоцонд явсан 38 хүний аминд хүрсэн гэдгээ Орос улс олон нийтэд хүлээн зөвшөөрч, буруутай этгээдүүдийг шийтгэхийг хүсч байна гэж Азербайжаны ерөнхийлөгч Илхам Алиев Бямба гаригт (2025.07.19) мэдэгдэв.  Уг ослыг Оросын ерөнхийлөгч Владимир Путин эмгэнэлт явдал болсон гэж тодорхойлж, тухайн үедээ Алиеваас уучлалт хүсч байжээ. Оросын эрх баригч нарын мэдэгдсэнээр, агаарын довтолгооноос хамгаалах албаныхан Украины нисгэгчгүй онгоцны эсрэг гал нээх үеэр Азербайжаны нисэх онгоц осолдсон. Улмаар Оросын эрх баригчид Азербайжаны зорчигч тээврийн онгоцны осолд бүрэн гэм буруугаа хүлээгээгүй аж.

Ханкенди хотод болсон Дэлхийн хэвлэл мэдээллийн форумын үеэр Алиев мэдэгдэхдээ, Оросын эрх баригчид онгоцны ослыг үл тоож болохгүй гэж буруутгаж, гэмт хэрэгтнүүдийг шийтгэхийг шаардсан.

Тэрбээр хэлэхдээ "Бид яг юу болсныг мэдэж байгаа. Бид баталж чадна. Түүнээс гадна Оросын албаны хүмүүс юу болсныг мэдэж байгаа гэдэгт бид итгэлтэй байна. Бодит асуулт бол хариуцлагатай хөршийн хийх ёстой зүйлийг яагаад хийхгүй байгаа юм бэ?" гэжээ. Алиев мөн буруутай этгээдүүдэд хариуцлага тооцохоос гадна хохирогчдын ар гэрийнхэн болон шархадсан хүмүүст нөхөн олговор олгохыг, устгасан онгоцны зардлыг Москва төлнө гэж найдаж буйгаа онцлон тэмдэглэсэн байна.

Бакугаас Чеченийн нийслэл Грозный хотыг чиглэн явж байсан "J2-8243" нислэг Оросын өмнөд хэсгээс чиглэлээ өөрчилснөөс хойш Казахстаны Актау хотын ойролцоо ослын буулт хийсэн.

Тухайн үед Украины нисгэгчгүй онгоцнууд хэд хэдэн хот руу довтолж байна гэсэн мэдээлэл гарсан байв. Гал дээр тос нэмнэ гэгчээр сүүлийн үед Оросын цагдаагийн байгууллага Орост амьдарч байгаа зарим азербайжан үндэстнийг баривчилж, янз бүрийн гэмт хэрэгт буруутгасан байна. Улмаар Москва, Баку хоёрын харилцаа эрс мууджээ.