ОХУ-ын нийслэл Москва хотод үргэлжлэн орсон аадар борооны улмаас Мягмар гаригт үер буужээ. Эрх баригчдын мэдээлснээр хотын зарим хэсэгт хоёр цаг хүрэхгүй хугацаанд нэг сарын хугацаанд ордогтой тэнцэх хэмжээний хур тунадас орсон байна. Цахим сүлжээнд нийтлэгдсэн бичлэгүүдийг харахад машинууд живж, газар доорх хонгилууд усаар дүүрчээ. Үерийн улмаас Москвагаар дамжин өнгөрдөг тээврийн хэрэгслийн хөдөлгөөнийг саатуулаад байна. Мөн хэд хэдэн метроны буудал болон Шереметьево нисэх онгоцны буудал хүрэх Аэроэкспресс галт тэрэгний үйлчилгээ тасалджээ.

Сүүлийн өдрүүдэд ОХУ-ын нийслэлд хэт халж, агаарын хэм 40 давсан. Хэт халалтаас залгуулаад орсон аадар бороо ийнхүү үерийн аюул дагуулжээ. ОХУ дэлхийн дунджаас 2.5 дахин хурдан дулаарч буй. Тийм учраас хэт халуун, аадар бороо зэрэг цаг агаарын эрс тэс үзэгдэлд өртөмтгий болсныг уур амьсгал судлаачид эртнээс анхааруулжээ.