Казахстан улс анхны цөмийн цахилгаан станцын төслөө ОХУ-ын Росатом корпорацитай хамтран гүйцэлдүүлэх нь эрсдэл бага гэж үзэж байна. Тодруулбал, Казахстаны ерөнхий сайд Олжас Бектенов Мягмар гаригт (2025.07.15) хийсэн мэдэгдэлдээ “Эрсдэл бага байх болно гэдэгт бид итгэж байна. Мэдээж Казахстан улсын хувьд чухал энэ төслийг хугацаанд нь хэрэгжүүлэхийн тулд Оросын хамт олонтой хамтран ажиллана" гэжээ. Өмнө нь Росатом корпораци Туркийн Аккую цөмийн станцын барилгын ажлыг гүйцэтгэж байжээ. Ерөнхий сайд Бектенов мөн "Туркийн хувьд Росатом компани Барих-өмчлөх-ашиглах (BOO) схемийн дагуу үйл ажиллагаа явуулсан. Энэ нь баригдсаны дараа станцыг эзэмших тухай юм. Харин Казахстанд барьсан цөмийн станц Казахстаных л байна" гэж онцлон тэмдэглэжээ.

Одоогоор Росатом нь Аккую төслийн 49 хувийг Турк болон гадаадын хөрөнгө оруулагчдад худалдахаар хэлэлцээ хийж байна. Казахстаны Цөмийн энергийн агентлаг өмнө нь Росатом компанийг тус улсын анхны цөмийн станцыг барих консорциумыг ахлуулахаар сонгосон бол хоёр дахь станцыг нь Хятадын “CNNC” барьж магадгүй байна.

Росатом компани Казахстанд “VVER-1200” реакторын хоёр блок барих зураг төслийг баталсан аж. Барилга угсралтын ажил ойролцоогоор 11 жил үргэлжлэх бөгөөд 2035-2036 он гэхэд дуусах төлөвтэй байна. Казахстанд баригдах эхний блок ОХУ-аас экспортын санхүүжилт авч магадгүй. Энэхүү төсөл нь нийт 14 тэрбум ам.долларын өртгөөр босох болно.