Биткойны ханш Даваа гаригт (2025.07.14) 120 мянган ам.доллар давж, хөрөнгө оруулагчдын магнай тэнийв. Тухайлбал, Биткойны ханш 121,953 ам.доллар дээр тогтохоосоо өмнө 2.4 хувиар нэмэгдэн 122,571 ам.долларт хүрч, дээд амжилт тогтоосон байна. Мөн өдөр АНУ-ын Төлөөлөгчдийн танхим олон жил хүлээгдсэн дижитал хөрөнгийн салбарыг улсын зохицуулалтын тогтолцоогоор хангах хуулийн төслийг хэлэлцэх болжээ.  "IG"-ийн зах зээлийн шинжээч Тони Сайкамор хэлэхдээ, хүчтэй институтийн эрэлт хэрэгцээ, цаашдын өсөлтийн хүлээлт, Трампын дэмжлэг зэрэг нь биткойн өсөлтийн шалтгаан болж байна. Мөн "Өнгөрсөн зургаагаас долоо хоногийн хугацаанд үзэгдээгүй хүчтэй өсөлт болсон. Одоо хаана зогсохыг нь харахад хэцүү байна.

125 мянган ам.долларт хялбар хүрчих юм шиг байна" гэжээ.

Биткойны ханш энэ жил 29 хувиар өссөн нь Трампын сүүлийн үеийн тарифын тодорхойгүй байдлыг үл харгалзан крипто зах зээлд илүү өргөн хүрээний өсөлтийг бий болгов. "Ethereum" гэхэд таван сарын дунджаар хамгийн дээд цэгтээ буюу 3,059.60 ам.долларт хүрч, "XRP" болон "Solana" тус бүр гурван хувиар өсжээ. "CoinMarketCap"-ийн мэдээлснээр, криптогийн зах зээлийн нийт үнэ одоо 3.81 их наяд ам.доллар болж өссөн байна.

"OKX"-ийн Сингапурын салбарын гүйцэтгэх захирал Грэйси Лин хэлэхдээ, биткойныг зөвхөн жижиглэнгийн болон институциональ хөрөнгө оруулагчид төдийгүй зарим төв банк хүртэл урт хугацааны нөөц хөрөнгө гэж үзэх болсон.

Тэрбээр мөн Азийн гэр бүлийн хөрөнгө, баялгийн менежерүүд крипто зах зээлд оролцох болсныг онцлон тэмдэглэж, биткойны эрэлт хэрэгцээ хувьсан өөрчлөгдөж байна гэжээ.

Түүнчлэн Вашингтон энэ долоо хоногийг крипто долоо хоног гэж зарлалаа. Учир нь хууль тогтоогчид крипто зах зээлтэй холбоотой гурван гол хуулийн төслийг санал хураалтаар хэлэлцэхээр төлөвлөж байна. Тодруулбал, тогтвортой коины холбооны дүрмийг бий болгох "Genius Act", тодорхой байдлын хууль болон "CBDC"-ийн эсрэг тандалтын улсын хуулийг батлах эсэхийг хэлэлцэх юм.

"Genius Act" нь крипто зохицуулалтыг илүү тодорхой болгох хамгийн чухал алхам гэж мэргэжилтнүүд үзэж байна.