Тулгар төр байгуулагдсаны 2234 жил, Их Монгол Улс байгуулагдсаны 819 жил, Үндэсний эрх чөлөө, тусгаар тогтнолоо сэргээн мандуулсны 114 жил, Ардын хувьсгалын 104 жилийн ойн үндэсний их баяр наадам өргөн дэлгэр болж өнгөрлөө. Баяр наадмын үеэр Хүй долоон худагт 370 худалдаа үйлчилгээний цэгт 576 зөвшөөрөл олгосон гэж холбогдох албаныхан мэдээлсэн. Наадам үзэхээр ирсэн иргэд, жуулчид болон орон нутгийн уяачид хоол хүнс, тоглоом, морь унуулах зэрэг үйлчилгээг идэвхтэй ашиглаж, баярлажээ.

Харин баяр наадмын гол зоог хуушуурын үнэ энэ жил 3500 төгрөг байв. Бусад хоолны тухайд, мантуун бууз зэрэг ширхэгийн хоол 3000-5000, үдэн 4000, догбуги 6000, шарсан зайдас 3500, салат (байцааны, шинэ ногооны, нийслэл) 5000, бусад хоол 15000, ус, ундаа 3000, сүүтэй цай 1000 төгрөгийн үнэтэй байв. Хоолны газрууд хөл хөдөлгөөн ихтэй, зарим үед суудал олдохгүй тохиолдол ч гарч байгаа харагдсан.

Үзвэр үйлчилгээний тухайд, 30 минут морь унахад 20000, 1 цаг унахад 50000 төгрөг, нэг тойрох буюу богино зайд 5000 төгрөгийн үнэтэй байлаа. Завь зэрэг янз бүрийн тоглоомнуудын хувьд ихэнх нь 30 минут нь 5000 төгрөгийн үнэтэй байв.

Баяр наадмаа тэмдэглэн Хүй долоон худаг дээр гэр бүлээрээ ирсэн иргэн Б.Маралаагийн хувьд ам бүл дөрвүүлээ бөгөөд хоол, уух зүйл, морь унах, тоглоом гээд нийтдээ нэг өдрийн зардал нь 280 мянган төгрөг болсон гэдгийг хэллээ.