Манай дэлхийгээс олдсон Ангараг гаригийн хамгийн том хэлтэрхийг ирэх Лхагва гаригт "Sotheby’s" дуудлага худалдааны фирм 2-4 сая ам.доллараар худалдахаар төлөвлөж байна. Тус хэлтэрхий нь 25 кг жинтэй бөгөөд хэмжээний хувьд 375 х 279 х 152 мм.

Улаан, хүрэн, саарал өнгийн хэлтэрхий асар том астероидын дайралтаас болж Ангараг гаригийн гадаргуугаас тасарсан гэж үзэж байна. Дуудлага худалдааны төвийн мэдээлснээр, солир 225 сая километр зам туулсны эцэст Сахарын цөлд унажээ. Улмаар 2023 оны арваннэгдүгээр сард олдсон байна. Тэр үеэс хойш солирыг Италийн сансрын агентлагийн үзэсгэлэнд хадгалж байжээ.

Үүнээс өмнө олдож байсан Ангараг гаригийн хэлтэрхий энэ удаагийнхаас 70 хувиар жижиг хэмжээтэй байжээ.

Дэлхий дээр албан ёсоор хүлээн зөвшөөрөгдсөн 77 мянга гаруй солир олджээ. Үүнээс ердөө 400 нь Ангарагийн солир байдаг учир энэ олдвор ховорт тооцогдоно.

Судлаачид хэлтэрхийг хэлтлэн авч дээжийг нь тусгай лабораторид илгээснээр Ангараг гаригаас ирсэн болохыг нь баталжээ. Ингэхдээ 1976 онд сансрын хайгуулын үеэр илрүүлсэн Ангарагийн солируудын найрлагатай харьцуулсан байна.

Дашрамд дурдахад, Лхагва гаригт болох дуудлага худалдаа нь "Sotheby’s Geek Week 2025" арга хэмжээний нэг хэсэг бөгөөд энэ үеэр бусад солир, чулуужсан олдвор, эрдэнийн чанартай ашигт малтмал зэрэг 122 зүйлийг худалдаална.