Газын зурвас дахь тусламжийн цэг рүү явж байгаад 31 хүн буудуулж амиа алджээ. Мөн өдөр /2025.07.12/ Израилийн агаарын цохилтод өртөж дор хаяж 28 хүн амиа алдсан бөгөөд тэдний дөрөв нь хүүхэд байв.

Буудуулсан 31 хүн Газын өмнөд хэсэгт орших Рафах хотын ойролцоох Газын хүмүүнлэгийн сангийн түгээлтийн цэг рүү явж байжээ. НҮБ-аас мэдээлснээр тавдугаар сарын сүүл үеэс хойш тусламжийн хүнс түгээх цэгүүдийг зорьж яваад 800 орчим хүн амиа алдсан байна. 21 дэх сардаа үргэлжилж буй дайны улмаас Газын зурваст хоёр сая гаруй хүний амь нас гадны тусламжаас хамааралтай болоод байгаа билээ.

17 настай Насир хүү хүнс түгээх цэг рүү явахдаа "Ээж ээ, бидэнд гурил алга. Би өнөөдөр очиж гурил авчирна. Үхсэн ч хамаагүй очоод аваад ирье" гэж хэлээд гарчээ. Гэвч харамсалтай нь тэр хэзээ ч эргэж ирээгүйг ойр дотныхон нь халаглан ярьж байна.

Дашрамд дурдахад, АНУ-ын ерөнхийлөгч Дональд Трамп, Израилийн ерөнхий сайд Беньямин Нетаньяху нар өнгөрсөн долоо хоногт хоёр өдрийн турш яриа хэлэлцээ хийсэн боловч гал зогсоох хэлэлцээрт ахиц гарсан шинж тэмдэг илэрсэнгүй. 60 хоног гал зогсоох тухай хэлэлцээний албан бус үе шат Бямба гаригт мөн үргэлжилжээ. Палестины эх сурвалжийн хэлснээр Израиль Газын зурвасаас цэргээ бүрэн гаргах Хамасын шаардлагаас татгалзаж буй нь яриа хэлэлцээний ахиц дэвшилд саад болж байгаа аж.