Залуусын хэлж заншсанаар "cool" буюу догь нэгэн болохын тулд ямар шаардлага хангасан байх ёстой вэ? Тэгвэл догь хүн гэж хэнийг хэлэх вэ гэсэн судалгааг дэлхийн 12 орны 5943 хүнээс авчээ. Үүнд, Өмнөд Солонгос, АНУ, Хятад, Герман, Мексик, Нигери зэрэг 12 улсын иргэд оролцжээ. Судалгааны дүн “Journal of Experimental Psychology” сэтгүүлд “Cool People” гарчигтайгаар нийтлэгдсэн байна.

Тус нийтлэлийг харвал догь хүн байхад шаардлагатай зургаан шинж чанар байна. Хэрвээ та экстоверт, амьдралд дурлагч, эрч хүчтэй, адал явдлыг эрэлхийлэгч, нээлттэй, биеэ даасан нэгэн бол өөрийгөө догь хүнд тооцож болох аж. Судалгаанд оролцогчид улс орон, нас, хүйс, боловсролын түвшингээс үл хамааран эдгээр шинж чанаруудыг догь гэж тооцно гэдгээ илэрхийлжээ.

Мөн "сайн хүн" гэж хэнийг хэлэхийг тэднээс асуусан байна. Оролцогчид тайван, эелдэг, халуун дулаан зан чанартай, ёс уламжлал, аюулгүй байдлын талаар ойлголттой хүнийг сайн хүн гэж хэлнэ гэжээ.