НАТО ирэх есдүгээр сараас арванхоёрдугаар сарын хооронд Польшийн тэнгэрт "F-35" сөнөөгч онгоцуудаар эргүүл хийхээр төлөвлөж байна. Эдгээр нь Нидерланд, Норвегийн онгоцууд байх юм. Нидерландын Батлан хамгаалах яамнаас зарласан хөтөлбөр нь холбоотны нутаг дэвсгэрийн ойролцоох Оросын үйл ажиллагааг таслан зогсоох зорилготой.

Өмнө нь энэ төрлийн ажиллагаанд "F-16", "Eurofighter" гэх мэт хуучин нисэх онгоцуудыг ашигладаг байв. Энэ удаад НАТО-гийн шууд командлал дор Польшоос анх удаа тав дахь үеийн "F-35" онгоцууд эргүүлд гарах гэж байна. Байршуулах ажиллагааны хүрээнд онгоцнууд 24/7 цагийн турш шуурхай хариу арга хэмжээ авна.

Өмнө нь "F-35" онгоцуудыг дасгал сургуулилалтын үеэр хэдхэн хоног л байршуулдаг байсан бол энэ удаад хамгийн урт хугацаагаар байршуулах гэж байна.

Дашрамд дурдахад, ОХУ Украины баруун хэсгийн дэд бүтэц, тэр дундаа барууны тусламж, зэр зэвсэг байнга нэвтэрдэг Луцк, Тернополь орчмын бүс нутгийг улам идэвхтэй онилж байна.

ОХУ-ын довтолгоо Польшийн хил рүү ойртох тусам нисгэгчгүй онгоц, пуужингууд нь хил даван нэвтрэх аюултай. Тус улсын Агаарын цэргийн хүчин 48 "F-16" онгоцтой бөгөөд Өмнөд Солонгосоос шинээр худалдаж авсан "FA-50" онгоцууд нь ашиглалтад дөнгөж орж байна. Мөн 2020 онд АНУ-ын үйлдвэрлэгч "Lockheed Martin" компаниас 32 ширхэг "F-35A" онгоц захиалсан бөгөөд эхнийхийг нь 2026 онд хүлээн авахаар төлөвлөж байна.