Хэн ч тэднийг зогсоож чадахгүй. Харин битгий саад бол.

Монголд өнөөдөр шинэ давалгаа эхэлжээ. Энэ бол улс төрийн, спортын, соёлын, бизнесийн хувьсгал… ЗАЛУУСЫН ХУВЬСГАЛ.

Энэ жилийн үндэсний их баяр наадмаар түрүү бөхийг хэн авсан гээч? 2001 онд төрсөн залуу. Зүгээр ч нэг барилдсангүй. Үнэмлэхүй илүүрхэж, шинэ цагийн хүчийг харуулсан. Төрийнхөө наадмыг тэр залуу үеийн илэрхийлэл болж хүртлээ. Энэ бол санамсаргүй давхцал биш.

Залуус төрийн ордонд орж ирж байна. Залуус түмний санал авч эхэлж байна. Залуус үг хэлж, тэмцэж, байр сууриа хамгаалж сурч байна. Засгийг унагааж байна.

Нэгэн үе “утсаа маажсан, утгагүй контент хөөсөн, ирээдүйгүй үе” хэмээн дорд үзэгдэж явсан 2000-аад оныхон өнөөдөр нийгмийн хамгийн хүчирхэг хөдөлгүүр болон сэргэж байна.

ТЭД ЮУ ХИЙЖ БАЙНА ВЭ?

Тэд амжилт гаргаж байна. Ямар ч улс төр, ямар ч "ахын дүү, аавын найзын" тогтолцоогүй, ямар ч хүлээсэнд баригдахаа, дийлдэхээ больжээ.

• Тэд олимпийн эрх авч байна.
• Тэд стартап байгуулж, дэлхийд гарч байна.
• Тэд төр, засгийг шүүмжилж өөрчлөхийг шаардаж байна.
• Тэд урлаг, соёлын тавцанд Монголыг шинээр тодорхойлж байна.

Залуусыг олон жил “юу ч мэдэхгүй”, “дуугүй бай”, “ядаж арван жил ажилла”, "татвар төлж үзсэн үү" гэх тайлбараар дарж ирсэн. Гэтэл яг үнэндээ туршлага гэдэг бол мэдэхгүй зүйлийг өөрийн гараар эхлүүлж үзэх зориг юм. Тэд яг үүнийг хийж байна.

МОНГОЛ БОЛ ЗАЛУУСЫН ОРОН

Монгол Улсын хүн амын 60 орчим хувь нь 35-аас доош насныхан. Бидэнд асар их хүч байна. Асар их боломж байна. Гэхдээ энэ боломжийг өдөр бүр хулгайлж байна.

Хулгайлагчид нь хэн бэ?

• Хуучин тогтолцооны сүлжээ
• Албан тушаалаа ойлгохгүй байгаа эрх мэдэлтнүүд
• “Зугаа цэнгэл нь ихэдлээ” хэмээн дуугардаг үе
• Шинэ санааг айдастайгаар хүлээж авдаг, дардаг тогтолцоо

Тэд залуусын боломжийг хулгайлж байна. Хөгжил биш, дарамт авчирч байна.

ГЭХДЭЭ НЭГ ҮНЭН БИЙ

Залуусыг зогсоох боломжгүй. Тэд бол эрх чөлөөний бүтээгдэхүүн. Ардчиллын жимээр алхсан үе. Одоогийн залуус Азийн цээжинд жижигхэн цэнхэртэх ардчилсан улсад төрж, мэндэлж, бойжсон. Тэд хуучин нийгмийн талаарх ойлголтгүй, "Картын бараа", "Социалист бүтээн байгуулалт", "БНМАУ Мандтугай", "Орос ах нар" гэдэг үгсийг чинь комеди болгох үе.

Тэд айдаггүй. Тэд дуугүй байдаггүй. Тэд бусдыгаа харсан ч, өөрийгөө харсан ч дутагдлын хажуугаар дуугүй өнгөрөхгүй. Тийм учраас л тэмцдэг. Бүтээдэг. Шинэчилдэг.

ЭЦЭСТ НЬ

Залуусын эсрэг бүү тэмц.
Тэдний боломжийг бүү хулгайл.
Харин тэднийг дэмж. Тэдэнтэй хамт хөгжье.

Монголын ирээдүй биш, одоо цаг нь залуус юм. Том ах болсон залуу үеийнхэн та нарыг харж байгаа шүү.