Бүс нутгийн хамтын ажиллагааг гүнзгийрүүлэх томоохон алхам болгон Казахстаны гадаад хэргийн сайд Мурат Нуртлеу энэ долоо хоногт Афганистанд айлчилсан. Тэрбээр энэхүү айлчлалынхаа хүрээнд Афганистаны дотоод болон гадаад бодлогод прагматик дэмжлэг үзүүлэх болсныг илтгэсэн юм. Айлчлалын үр дүнд Херат-Торгунди чиглэлийн төмөр замын 500 сая ам.долларын хэлэлцээр байгуулсан зэрэг дипломат болон эдийн засгийн чухал үйл явдлууд болжээ.

Нуртлеу айлчлалынхаа үеэр Афганистаны гадаад хэргийн сайдын үүрэг гүйцэтгэгч Амир Хан Муттаки болон Талибан тэргүүтэй засгийн газрын бусад өндөр албан тушаалтнуудтай уулзсан байна. Тэд хамтарсан мэдэгдэлдээ, Казахстан болон Кабул нь дамжин өнгөрөх тээвэр, худалдаа, боловсрол, бүс нутгийн аюулгүй байдлын салбарт харилцаагаа өргөжүүлэн, хөгжүүлэхийн төлөө байх болно гэдгээ онцлон тэмдэглэв. Нуртлеу мөн Афганистаныг тогтворжуулах, хүнсний аюулгүй байдал, иж бүрэн хөгжлийг хангахад Казахстаны зүгээс дэмжлэг үзүүлэхээ амлаж, Астана бүс нутгийн нийтлэг ашиг сонирхолд тулгуурлан Кабултай түншлэлээ өргөжүүлэхийг эрмэлзэж байна гэж мэдэгджээ.

Торгунди-Херат чиглэлийн төмөр зам барих хамтын ажиллагааны санамж бичигт гарын үсэг зурсан нь айлчлалын хамгийн онцлох үйл явдал байв. 115 километрийн урттай энэ шугам нь Афганистаны баруун хэсгийг Туркменистантай холбох бөгөөд Иран руу, цаашлаад өмнө зүгт Арабын тэнгис рүү холбогдох юм. Афганистаны Шадар сайд Абдул Гани Барадар хэлэлцээрийг сайшааж, хэлэлцээр нь Херат хотод ложистикийн төв байгуулах үндэс суурийг тавина гэж үзэж байна. Барадарын ажлын албаны мэдээлснээр, Афганистаны худалдаачдын визний зохицуулалтыг зөөлрүүлэх, Кабул болон Астанагийн хооронд шууд нислэгийг сэргээх, хоёр талын худалдааны хэмжээг нэмэгдүүлэх зэрэг асуудлыг хэлэлцсэн байна.

Талууд уул уурхай, зам тээвэр, харилцаа холбоо, эрчим хүч, дэд бүтэц зэрэг гол салбаруудад хамтарсан санаачлага гарган эдийн засгийн хамтын ажиллагаагаа өргөжүүлэхийг зорьж байна.  Тэд мөн хөдөө аж ахуйн бүтээгдэхүүний аюулгүй байдал, хил дамнасан ложистик, дамжин өнгөрөх тээврийн зардлыг бууруулах тухай хэлэлцээрийг албан ёсны болгох талаар авч хэлэлцсэн бөгөөд энэ нь улс хоорондын худалдааг 3 тэрбум ам.долларт хүргэх боломжит алхам аж.